പാലോട്: പ്രസംഗമത്സരത്തിന് തട്ടകത്തില്‍ കയറുന്നതിനുമുമ്പ് ശ്യാമയ്ക്ക് ഒരു നിര്‍ബന്ധമുണ്ടായിരുന്നു. ഗുരുവായൂരപ്പനെയും അഴീക്കോട് മാഷിനെയും കാണണം. ഗുരുവായൂരപ്പനെ കണ്ട് തൊഴാന്‍ കഴിഞ്ഞില്ലെങ്കിലും വാക്കിന്റെ കുലപതിയെ ആസ്പത്രി കിടക്കയിലെത്തി കാല്‍ തൊട്ടുവണങ്ങിയശേഷമാണ് ശ്യാമ മത്സരത്തിനൊരുങ്ങിയത്. ഫലം വന്നപ്പോള്‍ 15 പേരെയും പിന്തള്ളി ശ്യാമ നേടിയത് എ ഗ്രേഡോടെ ഒന്നാം സ്ഥാനം.
പാലോട് ഇളവട്ടം ബി.ആര്‍.എം. ഹൈസ്‌കൂള്‍ പത്താംക്ലാസ് വിദ്യാര്‍ഥിനിയാണ് ശ്യാമ. മുമ്പ് രണ്ടുവട്ടം റവന്യൂ ജില്ലയില്‍ ഒന്നാം സ്ഥാനം നേടിയിട്ടും സംസ്ഥാന മത്സരത്തില്‍ മുന്നിലെത്താന്‍ കഴിഞ്ഞിരുന്നില്ല. എന്നാല്‍, ഇത്തവണ കിട്ടിയ 'റിയാലിറ്റിഷോ-ജനപ്രീതിയും കലാമൂല്യവും' എന്ന വിഷയത്തില്‍ തനിക്ക് ഏറെ പറയാനുണ്ടായിരുന്നെന്ന് ശ്യാമ. അക്ഷരശ്ലോകത്തിലും നിരവധി സമ്മാനങ്ങള്‍ നേടിയിട്ടുണ്ട് ഈ മിടുക്കി. അഴീക്കോട് മാഷിനെപ്പോലെ നിറഞ്ഞ പദസമ്പത്തില്‍ പ്രസംഗിച്ച് തിളങ്ങണമെന്നതാണ് ശ്യാമയുടെ ആഗ്രഹം.