പാണ്ടിക്കാറ്റില്‍ വീടിന്റെ മേല്‍ക്കൂര പറന്നുപോയി

വിതുര: പാണ്ടിക്കാറ്റ് വീശിയടിച്ചതിനെ തുടര്‍ന്ന് വിതുര കല്ലാര്‍ അംബേദ്കര്‍ കോളനിയില്‍ ജെ. ജാനമ്മ (80) യുടെ വീടിന്റെ മേല്‍ക്കൂര പറന്നുപോയി. ഷീറ്റ് മേല്‍ക്കൂര പറന്ന് അടുത്തുള്ള വീടിന്റെ മുകളില്‍ പോയിരുന്നു. മേല്‍ക്കൂര നഷ്ടപ്പെട്ടതിനെത്തുടര്‍ന്ന് ജാനമ്മ ടാര്‍പ്പോളിന്‍കൊണ്ട് വീട് മൂടിയിരിക്കുകയാണ്. ജാനമ്മ ഒറ്റയ്ക്കാണ് താമസം. വിതുര വില്ലേജ് ഓഫീസില്‍ പരാതി നല്‍കി.

പിടിയിലായ രാജവെമ്പാല പെരുമ്പാമ്പിനെ ഛര്‍ദിച്ചു

വിതുര: വ്യാഴാഴ്ച വൈകീട്ട് വിതുര പൊന്നാംചുണ്ടില്‍ െവച്ച് വാവസുരേഷിന്റെ പിടിയിലായ രാജവെമ്പാല ഛര്‍ദിച്ചത് പെരുമ്പാമ്പിനെ. പൊന്നാംചുണ്ടിന് സമീപത്ത് കുന്നിന്‍ മുകളിലെ റബര്‍തോട്ടത്തിലാണ് ഉച്ചയ്ക്ക് രാജവെമ്പാലയെ കണ്ടെത്തിയത്.

തോട്ടത്തില്‍ വിറക് ശേഖരിക്കാനെത്തിയ ബിജു എന്ന യുവാവ് കണ്ട കാഴ്ച പെരുമ്പാമ്പിനെ വിഴുങ്ങിക്കൊണ്ടിരുന്ന രാജവെമ്പാലയെ. ഭയന്നോടിയ ബിജു നാട്ടുകാരെയും കൂട്ടി മടങ്ങിയെത്തി. നാട്ടുകാര്‍ വാവസുരേഷിനെ വിവരമറിയിച്ചു. വൈകീട്ടോടെ വാവ എത്തി പിടികൂടുന്നതിനിടെയാണ് രാജവെമ്പാല പെരുമ്പാമ്പിനെ ഛര്‍ദിച്ചത്.

തീറ്റ നഷ്ടപ്പെട്ടതിനാല്‍ അക്രമസ്വഭാവം കാട്ടിയ രാജവെമ്പാലയെ അല്‍പം ശ്രമകരമായാണ് വാവ ചാക്കില്‍ കയറ്റിയത്.താന്‍ പിടികൂടുന്ന 55ാമത്തെ രാജവെമ്പാലയാണിതെന്ന് സുരേഷ് പറഞ്ഞു. 

ശ്രീരാഗം കുടുംബശ്രീ അഞ്ചാം വാര്‍ഷികാഘോഷം

വിതുര: മണലി ശ്രീരാഗം കുടുംബശ്രീ യൂണിറ്റിന്റെ അഞ്ചാം വാര്‍ഷികം വിതുര ഗ്രാമപ്പഞ്ചായത്തംഗം എം.എസ്. റഷീദ് ഉദ്ഘാടനം ചെയ്തു. സംഘം പ്രസിഡന്റ് അജിതയുടെ അധ്യക്ഷതയില്‍ നടന്ന ചടങ്ങില്‍ എ.ഡി.എസ്. ചെയര്‍പേഴ്‌സണ്‍ ആര്‍.അംബിക, സെക്രട്ടറി മഞ്ജുഷ ആനന്ദ്, സംഘം െസക്രട്ടറി നിര്‍മല, ഖജാന്‍ജി മഞ്ജു എന്നിവര്‍ സംസാരിച്ചു.

ലോക സമാധാനത്തിന് ആയിരം മെഴുകുതിരികള്‍

വിതുര: യുദ്ധവിരുദ്ധ സന്ദേശം പകര്‍ന്ന് ലോക സമാധാനത്തിനായി വിതുര പൊന്‍മുടിവാലി പബ്ലിക് സ്‌കൂള്‍ വിദ്യാര്‍ഥികള്‍ ആയിരം മെഴുകുതിരി തെളിയിച്ചു.

യുദ്ധവിരുദ്ധ പ്രതിജ്ഞ, പ്രശ്‌നോത്തരി, ഹിേരാഷിമയില്‍ അണുബോംബ് വര്‍ഷിച്ചതിന്റെ വീഡിയോ പ്രദര്‍ശനം തുടങ്ങിയ പരിപാടികളുമുണ്ടായിരുന്നു.
പ്രിന്‍സിപ്പല്‍ എസ്. രാജേശ്വരി അമ്മ, എ.ഒ ബി.കെ. സോമശേഖരന്‍ നായര്‍, പി.ടി.എ പ്രസിഡന്റ് ബി.കെ. സജി, പി.ആര്‍.ഒ കെ. മണിലാല്‍, അധ്യാപകരായ പ്രശോഭ് എം. നായര്‍, മുഹമ്മദ് ഷാഫി, വിദ്യാര്‍ഥി പ്രതിനിധികളായ ബിപിന്‍, അര്‍ച്ചനാ കൃഷ്ണ എന്നിവര്‍ നേതൃത്വം നല്‍കി.

ഹിരോഷിമ ദിനം ആചരിച്ചു

വിതുര: യുദ്ധത്തിനെതിരെ സമാധാന സന്ദേശവുമായി വിദ്യാലയങ്ങളില്‍ ഹിരോഷിമ ദിനം ആചരിച്ചു. തൊളിക്കോട് ക്രിസ്തുകിരണ്‍ ഇംഗ്ലീഷ് മീഡിയം സ്‌കൂളില്‍ സംഘടിപ്പിച്ച സര്‍വമത പ്രാര്‍ഥനയില്‍ ഫാ. രാഹുല്‍ ബി. ആന്റോ, ഹിന്ദു ഐക്യവേദി സംസ്ഥാന സെക്രട്ടറി അനില്‍ തിരുമല, ഐ.എസ്.എം ജില്ലാ സെക്രട്ടറി നസീര്‍ വള്ളക്കടവ് എന്നിവര്‍ പങ്കെടുത്തു.

പ്രിന്‍സിപ്പല്‍ സി. സുജിത സേവ്യറിന്റെ അധ്യക്ഷതയില്‍ നടന്ന യോഗം പി.ടി.എ പ്രസിഡന്റ് എന്‍. ബിജു ഉദ്ഘാടനം ചെയ്തു. യുദ്ധഭീകരത വെളിപ്പെടുത്തുന്ന പോസ്റ്ററുകള്‍ വിദ്യാര്‍ഥികള്‍ തയ്യാറാക്കി റോഡിന്റെ വശങ്ങളില്‍ പ്രദര്‍ശിപ്പിച്ചു. അധ്യാപകരായ പ്രദീപ് കുമാര്‍, ജോബിദാസ്, ആര്‍. മഹേഷ്, റംസി ബീവി, എസ്. ലിസി, അഞ്ജുമോള്‍ എന്നിവര്‍ നേതൃത്വം നല്‍കി.
ചായം ഓള്‍സെയിന്റ്‌സ് പബ്ലിക് സ്‌കൂളില്‍ 69 കായിക പ്രതിഭകളെ പങ്കെടുപ്പിച്ച് സമാധാന ദീപശിഖാ പ്രയാണം നടത്തി. ഒമ്പതാം ക്ലാസ് വിദ്യാര്‍ഥി എ.എസ്. അനന്ദു നേതൃത്വം നല്‍കി. കലുങ്ക് കവലയില്‍ നടത്തിയ യുദ്ധവിരുദ്ധ സംഗമത്തില്‍ വിതുര ഫയര്‍ സ്റ്റേഷന്‍ ഉപമേധാവി ജി. രവീന്ദ്രന്‍ നായര്‍ വെള്ളരിപ്രാവിനെ ആകാശത്തേക്ക് പറത്തി.
പ്രിന്‍സിപ്പല്‍ സിസ്റ്റര്‍ റിറ്റി കാപ്പില്‍, വൈസ് പ്രിന്‍സിപ്പല്‍ സിസ്റ്റര്‍ റോസമിന്‍, പി.ടി.എ വൈസ് പ്രസിഡന്റ് സുജ, സ്റ്റാഫ് സെക്രട്ടറി രാജരത്‌നം, അധ്യാപകരായ സെലന്‍ ജോസ്, വി.ആര്‍. ദീപു, ടി.എന്‍. കുഞ്ഞുമോന്‍ തുടങ്ങിയവര്‍ നേതൃത്വം നല്‍കി.

തൂക്കുപാലം ഉപേക്ഷിച്ചെന്ന് ഉറപ്പ്: പ്രസിഡന്റ് പഞ്ചായത്തില്‍ തിരിച്ചെത്തി

വിതുര: തൂക്കുപാലം പണിയാനുള്ള നീക്കം ഉപേക്ഷിച്ചെന്ന് പട്ടികവര്‍ഗ വകുപ്പധികൃതരില്‍നിന്ന് ഉറപ്പ് ലഭിച്ചതിനെ തുടര്‍ന്ന് വിതുര പഞ്ചായത്ത് പ്രസിഡന്റ് വിപിന്‍ പഞ്ചായത്ത് ഓഫീസില്‍ തിരിച്ചെത്തി.

തലത്തൂതക്കാവിലെ ഗതാഗതയോഗ്യമായ പാലം അട്ടിമറിച്ച് തൂക്കുപാലം പണിയാനുള്ള നീക്കത്തില്‍ പ്രതിഷേധിച്ച് കഴിഞ്ഞദിവസം അദ്ദേഹം രാജിവെയ്ക്കാന്‍ ഒരുങ്ങിയിരുന്നു.
കോണ്‍ഗ്രസ് മണ്ഡലം കമ്മറ്റിയിലെ രാജിസന്നദ്ധത അറിയിച്ച വിപിന്‍ കരഞ്ഞുകൊണ്ടാണ് പഞ്ചായത്ത് ഓഫീസില്‍നിന്ന് ഇറങ്ങിപ്പോയത്. തുടര്‍ന്ന് മുതിര്‍ന്ന കോണ്‍ഗ്രസ് നേതാക്കള്‍ പ്രശ്‌നത്തില്‍ ഇടപെട്ടു. തലത്തൂതക്കാവില്‍ ഗതാഗതയോഗ്യമായ പാലത്തിന് 50 ലക്ഷം രൂപയുടെ അധികഫണ്ട് ആവശ്യമാണെന്ന് ജില്ലാ പഞ്ചായത്തംഗം ആനാട് ജയന്‍ അറിയിച്ചു.

കാറ്റ്: വൈദ്യുതി ഭാഗികമായി പുനഃസ്ഥാപിച്ചു; കൃഷിയും വീടും നഷ്ടമായവര്‍ നിരവധി

വിതുര: വെള്ളിയാഴ്ച വൈകീട്ട് വീശിയ കാറ്റില്‍ മരങ്ങള്‍വീണ് തകര്‍ന്ന വൈദ്യുതി ബന്ധം തൊളിക്കോട്, വിതുര പഞ്ചായത്തുകളില്‍ ഭാഗികമായി പുനഃസ്ഥാപിച്ചു. വെള്ളിയാഴ്ച രാത്രി മുഴുവന്‍ വൈദ്യുതിയില്ലാതിരുന്ന വിതുര ആശുപത്രിയില്‍ ശനിയാഴ്ച ഉച്ചയ്ക്കുശേഷമാണ് വൈദ്യുതി നല്‍കാന്‍ കഴിഞ്ഞത്. മൂന്ന് പോസ്റ്റുകളാണ് ഇവിടെമാത്രം തകര്‍ന്നതെന്ന് കെ.എസ്.ഇ.ബി. എ.ഇ. അറിയിച്ചു. ആശുപത്രിയില്‍ ജനറേറ്റര്‍ സംവിധാനമൊരുക്കാത്തത് പ്രതിഷേധത്തിനും വഴിവെച്ചു.

തൊളിക്കോട് ഇലക്ട്രിക്കല്‍ സെക്ഷനില്‍ കരിപ്പാലം, തേവിയാരുകുന്ന്, ഒന്നാംപാലം ട്രാന്‍സ്‌ഫോര്‍മറുകള്‍ക്ക് കീഴിലാണ് ഏറെ നാശനഷ്ടമുണ്ടായത്.
നൂറുകണക്കിന് വാഴകളും റബ്ബര്‍ മരങ്ങളും പ്ലാവ്, മാവ് തുടങ്ങിയവയും നിലംപതിച്ചിട്ടുണ്ട്. കൃഷി സജീവമായ വിതുര ചായം ഏലായില്‍ രവീന്ദ്രന്‍നായര്‍, ആശ, ശശിധരന്‍ നായര്‍ തുടങ്ങിയവരുടെ നൂറുകണക്കിന് കുലച്ച ഏത്തവാഴകളാണ് കാറ്റില്‍വീണത്. കഴിഞ്ഞ കൊല്ലത്തെ പ്രകൃതിക്ഷോഭത്തിന്റെ നഷ്ടപരിഹാരംപോലും ഇതുവരെ കിട്ടിയിട്ടില്ലെന്ന് ചായത്തെ കര്‍ഷകര്‍ പറയുന്നു.
തൊളിക്കോട് പഞ്ചായത്തിലെ പുളിമൂട് വാര്‍ഡില്‍ നാല് വീടുകള്‍ തകര്‍ന്നതായി വാര്‍ഡംഗം തോട്ടുമുക്ക് അന്‍സര്‍ അറിയിച്ചു. പൊന്‍പാറ മോഹനന്‍, രാജേന്ദ്രന്‍, ത്യാഗരാജന്‍, വെട്ടയില്‍ മീന എന്നിവരുടെ വീടുകളാണ് തകര്‍ന്നത്. ഓഫീസുകള്‍ അവധിയായതിനാല്‍ റവന്യൂ ഉദ്യോഗസ്ഥരെ േഫാണ്‍ ചെയ്താണ് പലരും പരാതി അറിയിച്ചത്. 

വേനല്‍മഴ: വിതുരയില്‍ പരക്കെ നാശം

 

വിതുര: ശനിയാഴ്ച ഉച്ചതിരിഞ്ഞ് പെയ്ത വേനല്‍ മഴയില്‍ വിതുര മേഖലയില്‍ പരക്കെ നാശം. അസംഖ്യം മരങ്ങളാണ് കടപുഴകിയും ഒടിഞ്ഞും വീണത്. മാങ്കാല ധന്യാഭവനില്‍ അംബികയുടെ വീട് തകര്‍ന്നിട്ടുണ്ട്. വൈദ്യുതി, ഫോണ്‍ ബന്ധങ്ങള്‍ രാത്രി വൈകിയും പുനഃസ്ഥാപിക്കാന്‍ കഴിഞ്ഞിട്ടില്ല. ബി.എസ്.എന്‍.എല്‍ മൊബൈല്‍ ടവര്‍ കേടായതു കാരണം മൊബൈല്‍ ഫോണുകളും പ്രവര്‍ത്തിക്കുന്നില്ല. ഞായറാഴ്ച വൈദ്യുതി പുനഃസ്ഥാപിക്കാന്‍ കഴിയുമെന്ന് പ്രീതീക്ഷിക്കുന്നതായി വിതുര എ.ഇ വിന്‍സ്റ്റണ്‍ അറിയിച്ചു.

വിദ്യാഭ്യാസ വായ്പ നിഷേധിക്കുന്ന ബാങ്കുകള്‍ക്കെതിരെ സമരം നടത്തും: പ്രവാസി റിട്ടേണീസ് കോണ്‍ഗ്രസ്

വിതുര. പാവപ്പെട്ട വിദ്യാര്‍ഥികള്‍ക്കു വിദ്യാഭ്യാസവായ്പ നിഷേധിക്കുന്ന ബാങ്കുകളുടെ നടപടികള്‍ ഉപേക്ഷിക്കണമെന്നു പ്രവാസി റിട്ടേണീസ് കോണ്‍ഗ്രസ് തിരുവനന്തപുരം ജില്ലാകമ്മിറ്റി യോഗം ആവശ്യപ്പെട്ടു. വിദ്യാഭ്യാസ വായ്പയ്ക്ക് അപേക്ഷ നല്‍കിയാല്‍ ചില മുടന്തന്‍ ന്യായങ്ങള്‍ നിരത്തി വായ്പ നിഷേധിക്കുന്ന നിലപാടാണു മിക്ക ബാങ്കുകളും സ്വീകരിച്ചു വരുന്നതെന്നും വായ്പയ്ക്കായി ബാങ്കുകളില്‍ കയറിയിറങ്ങി നട്ടം തിരിയുകയാണെന്നും വായ്പ ലഭിക്കാത്തതുമൂലം അനവധി വിദ്യാര്‍ഥികളുടെ ഉന്നതവിദ്യാഭ്യാസം എന്ന സ്വപ്നം തകര്‍ന്നുവെന്നും ഇതിനെതിരെ ബാങ്ക് പടിക്കല്‍ ശക്തമായ സമര പരിപാടികള്‍ സംഘടിപ്പിക്കുമെന്നും പ്രവാസി റിട്ടേണീസ് കോണ്‍ഗ്രസ് ജില്ലാ ഭാരവാഹികളായ പള്ളിവിള സലിം, ഇ.എം. നസീര്‍, എസ്. ജയേന്ദ്രകുമാര്‍, ആനപ്പാറ റഷീദ്, എ.എം. കാസിം എന്നിവര്‍ അറിയിച്ചു.

ചേന്നന്‍പാറയില്‍ ലോറി മറിഞ്ഞു; അപകടം ഒഴിവായി

വിതുര. ചേന്നന്‍പാറ ജോടെക് സെമിനാരിക്കു സമീപം വളവില്‍ റബര്‍ത്തടി കയറ്റിവന്ന ലോറി മറിഞ്ഞു. ഡ്രൈവര്‍ ചാടി രക്ഷപ്പെട്ടതിനാല്‍ ദുരന്തം ഒഴിവായി. റോഡില്‍ തെന്നിയാണ് അപകടം ഉണ്ടായത്. ഇവിടെ അടുത്തിടെ ബൈക്ക് മരത്തിലിടിച്ച് ഒരു യുവാവ് മരിച്ചിരുന്നു. ഏതാനും ദിവസം മുന്‍പു തെന്നൂര്‍ സൂര്യകാന്തിയില്‍ നിന്നു തടികയറ്റി ചെറ്റച്ചലിലേക്കു വന്ന ലോറി മറിഞ്ഞു പത്തു പേര്‍ക്കു പരുക്കേറ്റിരുന്നു.

വിതുരയില്‍ പരിസ്ഥിതി പഠനക്യാംപ് നടത്തി

വിതുര. ബാലജനസഖ്യം വിതുര യൂണിയന്റെയും വിതുര സുഹൃത്ത് സഖ്യത്തിന്റെയും ബാലഭവന്റെയും നേതൃത്വത്തില്‍ പരിസ്ഥിതിപഠനക്യാംപും സിനിമാ പ്രദര്‍ശനവും നടത്തി. 70  സഖ്യാംഗങ്ങള്‍ പങ്കെടുത്തു. സഖ്യം സഹകാരി ഫോറം കണ്‍വീനര്‍ ആര്‍.സുധാകരന്റെ അധ്യക്ഷതയില്‍ കുമാരപുരം വിജയകുമാര്‍ ഉദ്ഘാടനം ചെയ്തു.ശ്രീകുമാര്‍ ക്ളാസെടുത്തു. പ്രകൃതിസംരക്ഷണത്തിനായി മരങ്ങള്‍ നട്ടുപിടിപ്പിക്കാനും അവയെ സംരക്ഷിക്കാനും കുട്ടികളെ പഠിപ്പിച്ചു. മലയാള മനോരമയുടെ ഭൂമിക്കാരു കുട പദ്ധതിയുമായി സഹകരിച്ചു വിവിധ പരിപാടികള്‍ സംഘടിപ്പിക്കാന്‍ പഠനക്യാംപില്‍ തീരുമാനമായി.

മണ്ണറ ബാലന്‍െറ നിര്യാണത്തില്‍ അനുശോചിച്ചു

വിതുര.  കോണ്‍ഗ്രസ് നേതാവും ഡിസിസി അംഗവുമായിരുന്ന വിതുര മണ്ണറ അനിഴത്തില്‍ മണ്ണറ ആര്‍. ഭാസ്കരരന്‍നായരുടെ മകന്‍ മണ്ണറ ബാലകൃഷ്ണന്‍നായരുടെ(മണ്ണറ ബാലന്‍) നിര്യാണത്തില്‍ വിവിധ രാഷ്ട്രീയകക്ഷി നേതാക്കള്‍ അനുശോചനം രേഖപ്പെടുത്തി. കെപിസിസി അംഗം, പഞ്ചായത്തംഗം, മണ്ഡലം പ്രസിഡന്റ്, ചായം സഹകരണ ബാങ്ക് സെക്രട്ടറി, നെറ്റ്കോസ് ഡയറക്ടര്‍ എന്നീ നിലകളില്‍ പ്രവര്‍ത്തിച്ച മണ്ണറ ബാലന്‍ വിതുര മേഖലയില്‍ കോണ്‍ഗ്രസ് പ്രസ്ഥാനം കെട്ടിപ്പടുക്കുന്നില്‍ നിസ്തുല പങ്കു വഹിച്ചിട്ടുണ്ട്. 

കെ. കരുണാകരന്‍ ഡിഐസി രൂപീകരിച്ചപ്പോള്‍ ഒപ്പം ചേര്‍ന്നെങ്കിലും പിന്നീടു കോണ്‍ഗ്രസില്‍ മടങ്ങിയെത്തി. സ്പീക്കര്‍ ജി. കാര്‍ത്തികേയന്‍, പാലോട് രവി എംഎല്‍എ, മുന്‍ എംപി തലേക്കുന്നില്‍ ബഷീര്‍, ജില്ലാ പഞ്ചായത്ത് പ്രസിഡന്റ് രമണി പി. നായര്‍, കരകുളം കൃഷ്ണപിള്ള എന്നിവരും അനവധി പ്രദേശികനേതാക്കളും അന്ത്യോപചാരമര്‍പ്പിക്കാന്‍ എത്തിയിരുന്നു.

മണ്ഡലം പ്രസിഡന്റ് വി. അനിരുദ്ധന്‍നായരുടെ അധ്യക്ഷതയില്‍ കലുങ്ക് ജംക്ഷനില്‍ കൂടിയ അനുശോചന യോഗത്തില്‍ സി.എസ്. വിദ്യാസാഗര്‍, പി.എസ്. പ്രശാന്ത്, വി.കെ. മധു, പി.സി. ജനാര്‍ദനന്‍, പി. ബാലകൃഷ്ണന്‍നായര്‍, മസൂദ്, എന്‍. ജയമോഹനന്‍, പി. പുഷ്പാംഗദന്‍, ശ്രീകണ്ഠന്‍നായര്‍, എസ്. കുമാരപിള്ള, മാന്‍കുന്നില്‍ പ്രകാശ്, കെ. വിജയകുമാര്‍, ലാല്‍റോഷിന്‍, എസ്.എന്‍. ക്ളമന്റ്്, എം.എസ്. സെല്‍വന്‍, ഡി. അജയകുമാര്‍ തുടങ്ങിവര്‍ അനുശോചിച്ചു. മണ്ണറ ബാലന്‍െറ സഞ്ചയനം നാളെ രാവിലെ ഒന്‍പതിനു നടക്കും.

വിതുരയില്‍ ഇന്ന് കാന്‍സര്‍ നിര്‍ണയക്യാംപ്

വിതുര.കഴക്കൂട്ടം സൈനിക സ്കൂളിലെ പൂര്‍വ വിദ്യാര്‍ഥികളുടെയും തിരുവനന്തപുരം റീജനല്‍ കാന്‍സര്‍ സെന്ററിന്റെയും നേതൃത്വത്തില്‍ ഇന്നു രാവിലെ പത്തിന് വിതുര തലത്തൂതക്കാവ് സ്കൂളില്‍  സമഗ്ര വൈദ്യപരിശോധനയും കാന്‍സര്‍ നിര്‍ണയ ക്യാംപും നടക്കും. പഞ്ചായത്ത് പ്രസിഡന്റ് എല്‍.വി. വിപിന്‍ അധ്യക്ഷതവഹിക്കും. സ്പീക്കര്‍ ജി. കാര്‍ത്തികേയന്‍ ഉദ്ഘാടനം ചെയ്യും. ആര്‍സിസിയിലെ വിദഗ്ധ ഡോക്ടര്‍മാര്‍ ക്യാംപിനു നേതൃത്വം നല്‍കും.

വിതുര പഞ്ചായത്തില്‍ കരനെല്‍കൃഷി തുടങ്ങി

വിതുര: ഗ്രാമപ്പഞ്ചായത്തിലെ കരനെല്‍കൃഷിക്ക് വിതുര ഗവണ്‍മെന്റ് വി.ആന്‍ഡ്എച്ച്. എസ്. സ്‌കുളില്‍ തുടക്കമായി. ഉപയോഗിക്കാതെ കിടന്ന അരയേക്കറോളം സ്ഥലം തൊഴിലുറപ്പ് തൊഴിലാളികളെക്കൊണ്ട് നിരപ്പാക്കിയെടുത്താണ് കൃഷി തുടങ്ങിയത്. ഗ്രാമപ്പഞ്ചായത്ത് പ്രസിഡന്റ് എല്‍.വി . വിപിന്‍ വിത്തെറിഞ്ഞ് കൃഷി ഉദ്ഘാടനം ചെയ്തു. സ്‌കൂള്‍ പ്രിന്‍സിപ്പല്‍ മൃദുലാദേവി, പി.ടി.എ. പ്രസിഡന്റ് കെ. കൃഷ്ണകുമാര്‍, വിതുര കൃഷി ഓഫീസര്‍, ഗ്രാമപഞ്ചായത്തംഗങ്ങള്‍ തുടങ്ങിയവര്‍ പങ്കെടുത്തു. കൃഷി ഭവന്റെ മേല്‍നോട്ടത്തില്‍ പഞ്ചായത്തിലെ സ്‌കൂളുകള്‍ കേന്ദ്രീകരിച്ച് നടപ്പിലാക്കാന്‍ ഉദ്ദേശിക്കുന്ന പദ്ധതിയുടെ അടുത്ത ഘട്ടം ചെറ്റച്ചല്‍ ജവഹര്‍ നവോദയ വിദ്യാലയത്തില്‍ നടക്കും .

ജീപ്പ് സര്‍വീസ് തുടങ്ങി

വിതുര: പൊടിയക്കാല ആദിവാസി സെറ്റില്‍മെന്റിലെ കുട്ടികള്‍ക്കായി പട്ടികവര്‍ഗ വകുപ്പിന്റെ ജീപ്പ് സര്‍വീസ് തുടങ്ങി. മീനാങ്കല്‍ ഗവണ്മെന്റ് ട്രൈബല്‍ ഹൈസ്‌കൂളിലേക്ക് രണ്ട് ജീപ്പുകളാണ് സര്‍വീസ് നടത്തുക. കാട്ടാനകളില്‍നിന്നുള്ള ഭീഷണി ഒഴിവാക്കാന്‍ കഴിഞ്ഞ അധ്യയനവര്‍ഷമാണ് ആദ്യമായി ജീപ്പ് സര്‍വീസ് തുടങ്ങിയത്. മധ്യവേനലവധിക്ക് നിര്‍ത്തിയ സര്‍വീസ് സ്‌കൂള്‍ തുറന്നിട്ടും തുടങ്ങാത്തതിനെപ്പറ്റി 'മാതൃഭൂമി' വാര്‍ത്ത പ്രസിദ്ധീകരിച്ചിരുന്നു. ജീപ്പ് സര്‍വീസ് തുടങ്ങണമെന്ന് ആവശ്യപ്പെട്ട് ആദിവാസി മഹാസഭ പ്രവര്‍ത്തകര്‍ കഴിഞ്ഞ ദിവസം നെടുമങ്ങാട് ഐ.ടി.ഡി.പി. ഓഫീസില്‍ ധര്‍ണ നടത്തുകയുംചെയ്തു.

പനി ബാധിച്ച് വീട്ടമ്മ മരിച്ചു

തിരുവനന്തപുരം: ജില്ലയില്‍ ഡെങ്കിയും പകര്‍ച്ചപ്പനിയും പടരുന്നു. ചൊവ്വാഴ്ച പനിബാധിച്ച് ചികിത്സയിലായിരുന്ന വീട്ടമ്മ മരിച്ചു. ജില്ലയില്‍ 15 പേര്‍ക്ക് കൂടി ഡെങ്കിപ്പനി ബാധിച്ചതായി ആരോഗ്യ വകുപ്പ് സ്ഥിരീകരിച്ചു.ആനപ്പാറ സാലന്‍ ഭവനില്‍ സൈലസിന്റെ ഭാര്യ എസ്. നിര്‍മല (49)യാണ് പനിബാധിച്ച് മരിച്ചത്.മെഡിക്കല്‍ കോളേജ് ആസ്​പത്രിയില്‍ ചികിത്സയിലിരിക്കെയാണ് മരണം.

മക്കള്‍: ഷൈജു, പരേതയായ സൗമ്യ. മരുമകള്‍: അനു.കഴിഞ്ഞ ദിവസം പനിബാധിച്ച് ഗര്‍ഭിണി മരിച്ചിരുന്നു. ഈ മാസം പനിബാധിച്ച് ജില്ലയില്‍ മൂന്ന് പേരാണ് മരിച്ചത്.ചൊവ്വാഴ്ച ജില്ലയിലെ വിവിധ സര്‍ക്കാര്‍ ആസ്​പത്രികളിലായി 17,680 പേര്‍ ചികിത്സ തേടി. ഇതില്‍ 1100 പേര്‍ പുതിയതായി പനിബാധിച്ച് എത്തിയവരാണ്. 34 പേരെ വിവിധ ആസ്​പത്രികളിലായി പ്രവേശിപ്പിച്ചിട്ടുണ്ട്.

ചൊവ്വാഴ്ച 15 പേര്‍ക്ക് കൂടി ഡെങ്കി പോസിറ്റീവാണെന്ന് സ്ഥിരീകരിച്ചു. തിങ്കളാഴ്ച 13 പേര്‍ക്ക് ഡെങ്കിയാണെന്ന് കണ്ടെത്തിയിരുന്നു. ഈ മാസം ഇതുവരെയായി നൂറോളം പേര്‍ക്കാണ് ഡെങ്കിപ്പനി ബാധിച്ചത്.ഡെങ്കിപ്പനി ബാധിക്കുന്നവരില്‍ ഭൂരിഭാഗവും നഗര പ്രദേശത്തുള്ളവരാണ്.

ജില്ലാ മെഡിക്കല്‍ ഓഫീസറുടെ നേതൃത്വത്തില്‍ നഗരപ്രദേശത്ത് പനി നിര്‍ണയ ക്യാമ്പുകള്‍ സംഘടിപ്പിക്കുന്നുണ്ട്.മെഡിക്കല്‍ കോളേജിലെയും ജനറല്‍ ആസ്​പത്രിയിലെയും പനി വാര്‍ഡുകളില്‍ രോഗികളെക്കൊണ്ട് നിറഞ്ഞുകവിഞ്ഞു. മെഡിക്കല്‍ കോളേജിലെ 22-ാം വാര്‍ഡില്‍ കിടക്കകള്‍ ഇല്ലാത്തത് കാരണം തറയിലാണ് രോഗികളെ കിടത്തിയിരിക്കുന്നത്.

ഇടവപ്പാതി കനിയുന്നില്ല:കുടിവെള്ള ക്ഷാമം രൂക്ഷമാകുന്നു

വിതുര. ഇടവ മാസം അവസാനിക്കാറായിട്ടും ശക്തമായി മഴ പെയ്യാത്തതുമൂലം കുടിവെള്ളക്ഷാമം രൂക്ഷമാകുന്നു. അതികഠിനമായ ചൂടുമൂലം നീരുറവകളും നീര്‍ച്ചാലുകളും മറ്റും മാസങ്ങളായി വറ്റിവരണ്ടു കിടക്കുകയാണ്. ഭൂരിഭാഗം കിണറുകളില്‍നിന്നും ജലം അപ്രത്യക്ഷമായി കഴിഞ്ഞു. നദികളിലും ജലനിരപ്പു ഗണ്യമായി കുറഞ്ഞു. ഇടയ്ക്കു വേനല്‍മഴ പെയ്തെങ്കിലും ജലക്ഷാമത്തിനു പരിഹാരമായില്ല. തുലാമാസത്തിലാണു ശക്തമായ മഴ പെയ്തത്. തുലാവര്‍ഷം കഴിഞ്ഞിട്ട് ആറുമാസം പിന്നിട്ടെങ്കിലും മഴ കനിയാത്തതു കര്‍ഷകര്‍ക്കും മറ്റും കനത്ത ആഘാതമായിരിക്കുകയാണ്.

വേനല്‍ച്ചൂടിന്‍െറ തീഷ്ണത മൂലം കൃഷികളും മറ്റും വ്യാപകമായി ഉണങ്ങി നശിച്ചു. കടുത്ത വേനല്‍ കര്‍ഷകര്‍ക്കു കനത്ത നാശനഷ്ടമാണു വിതച്ചിരിക്കുന്നത്. കഴിഞ്ഞ വര്‍ഷത്തെക്കാള്‍ ഇക്കുറി ചൂടിന്‍െറ തീവ്രത വര്‍ധിച്ചതായി കര്‍ഷകര്‍ പറയുന്നു. വെള്ളം ലഭ്യമല്ലാത്തതുമൂലം മിക്കവര്‍ക്കും കൃഷിയിറക്കാനും സാധിച്ചിട്ടില്ല. എങ്ങും ചൂടിന്‍െറ തീവ്രതയും ജലക്ഷാമവുമാണു ചര്‍ച്ചാവിഷയം. ചൂടു ക്രമാതീതമായി ഉയര്‍ന്നതോടെ വൈദ്യുതി ഉപഭോഗവും ഗണ്യമായി വര്‍ധിച്ചു. ഫാന്‍, എസി വില്‍പനയും കുത്തനെ കൂടി. ഫാനില്ലാതെ ഉറങ്ങാന്‍ കഴിയാത്ത സ്ഥിതിയായി.

സൂര്യാഘാതമേറ്റു പൊള്ളലേറ്റ സംഭവവും, പശുക്കള്‍ കുഴഞ്ഞുവീണ സംഭവവും ഉണ്ടായി. കുടിവെള്ള ക്ഷാമം രൂക്ഷമായതിനെ തുടര്‍ന്നു ചില പഞ്ചായത്തുകളില്‍ ടാങ്കര്‍ലോറികളില്‍ ശുദ്ധജല വിതരണം നടത്തിയെങ്കിലും ഒരാഴ്ച പിന്നിട്ടപ്പോള്‍ നിര്‍ത്തി. നദിയില്‍
ജലനിരപ്പു താഴ്ന്നതു കുടിവെള്ള വിതരണത്തെ പ്രതികൂലമായി ബാധിച്ചിട്ടുണ്ട്. മിക്ക പ്രദേശത്തും ഡാമുകളില്‍നിന്നും മറ്റും ടാങ്കര്‍ ലോറിയില്‍ കുടിവെള്ളം ശേഖരിച്ചാണ് ഉപയോഗിക്കുന്നത്. വിതുര പഞ്ചായത്തിലെ പോറ്റിക്കുന്ന്, ആറ്റിന്‍പുറം, ലക്ഷംവീട്, തൊളിക്കോട് പഞ്ചായത്തിലെ ഉണ്ടപ്പാറ, തേക്കുംമൂട്, പച്ചമല പ്രദേശത്തുകാര്‍ ശുദ്ധജലത്തിനായി നെട്ടോട്ടമോടുകയാണ്.

പ്രദേശത്തെ എല്ലാ ജലസ്രോതസുകളും വറ്റിവരണ്ടിട്ടിട്ടു മാസങ്ങളായി. പൈപ്പുജല വിതരണം കൂടി അടിക്കടി തടസ്സപ്പെട്ടതു ഗ്രാമവാസികള്‍ക്ക് ആഘാതമായി. കിലോമീറ്ററുകളോളം നടന്നു നദിയില്‍നിന്നു ജലം ശേഖരിച്ചുകൊണ്ടുവന്ന് ഉപയോഗിക്കേണ്ട സ്ഥിതിയാണു നിലവില്‍. അനിയന്ത്രിതമായ മണലൂറ്റുമൂലം വാമനപുരം നദി വറ്റിവരണ്ടു. നദിയുടെ മിക്കഭാഗത്തും മണല്‍കുഴികളില്‍ മലിനജലം കെട്ടിക്കിടക്കുകയാണ്. നീരൊഴുക്കു ഗണ്യമായി കുറഞ്ഞതോടെ നദിയുടെ ചില ഭാഗങ്ങള്‍ നിശ്ചലമായി കിടക്കുന്നു. ജലക്ഷാമം അതിരൂക്ഷമായതോടെ നദിയിലെ മലിനജലം ഉപയോഗിക്കേണ്ട അവസ്ഥയാണെന്നു നാട്ടുകാര്‍ പരാതിപ്പെട്ടു.

കല്ലാറിലേക്കു വനത്തില്‍നിന്ന് ഒഴുകിയെത്തിയിരുന്ന വെള്ളച്ചാട്ടങ്ങളും മെലിഞ്ഞുണങ്ങി. ചില വെള്ളച്ചാട്ടങ്ങള്‍ അപ്രത്യക്ഷമാകുകയും ചെയ്തു. ആദിവാസിമേഖലയിലെ സ്ഥിതിയും വിഭിന്നമല്ല. പേപ്പാറ ഡാമിലും ജലനിരപ്പു കുറഞ്ഞു. വനാന്തരങ്ങളിലും ചൂടു വ്യാപിച്ചതോടെ കാട്ടുമൃഗങ്ങള്‍ നാട്ടിലിറങ്ങി ശല്യം തുടങ്ങി. വനത്തിലും കഠിനമായ ജലക്ഷാമം നേരിടുന്നതായി ആദിവാസികള്‍ പറഞ്ഞു. പേപ്പാറ ഡാമില്‍ വെള്ളം കുടിക്കാന്‍ എത്തുന്ന ആനകളുടെ എണ്ണവും വര്‍ധിച്ചു. ജൂണ്‍ മാസം പകുതിയാകുമ്പോഴെങ്കിലും മഴ തിമര്‍ത്തുപെയ്യുമെന്ന പ്രതീക്ഷയില്‍ വേഴാമ്പലിനെപ്പോലെ കാത്തിരിക്കുകയാണു കര്‍ഷകരും മറ്റും.

ജഴ്സിഫാം ബസ് ചാത്തന്‍കോട് വരെ നീട്ടണം

വിതുര. ആദിവാസി വിദ്യാര്‍ഥികളുടെയും മറ്റും യാത്രാസൌകര്യം കണക്കിലെടുത്തു വിതുര കെഎസ്ആര്‍ടിസി ഡിപ്പോയില്‍ നിന്നു ജഴ്സിഫാം വരെ സര്‍വീസ് നടത്തുന്ന ബസുകള്‍ ചാത്തന്‍കോട് വരെ നീട്ടണമെന്ന് ആദിവാസി മഹാസഭ സംസ്ഥാന കമ്മിറ്റി ആവശ്യപ്പെട്ടു. ചാത്തന്‍കോട്,ചെമ്മാംകാല,വലിയകാല പ്രദേശത്തു കാട്ടാനശല്യം വര്‍ധിച്ചിരിക്കുകയാണ്.

സ്കൂള്‍വിട്ടു കാട്ടാനകള്‍ താണ്ഡവമാടുന്ന ഘോരവനത്തിലൂടെ നാലു കിലോമീറ്റര്‍ നടന്നാണു വിദ്യാര്‍ഥികള്‍ക്കു വീട്ടിലെത്തേണ്ടത്്.  ഇപ്പോള്‍ വിതുര ഡിപ്പോയില്‍ നിന്നു രണ്ടു സര്‍വീസുകളാണു ചാത്തന്‍കോട്ടേക്കുള്ളത്.  ബസ് സര്‍വീസ് നീട്ടിയാല്‍ കുട്ടികള്‍ക്കു രാത്രിയാകുംമുന്‍പു വീട്ടിലെത്താന്‍ കഴിയും. ആവശ്യം ഉന്നയിച്ച് എഎംഎസ് സെക്രട്ടറി എം.നാരായണന്‍ മന്ത്രിക്കും വിതുര ഡിപ്പോയിലും നിവേദനം നല്‍കി.

വിതുരയില്‍ ബസ്സപകടം

താത്കാലിക ജീവനക്കാരിയെ പിരിച്ചുവിട്ട ഗസ്റ്റ്ഹൗസ് മാനേജരെ സ്ഥലംമാറ്റി

വിതുര: താത്കാലികാടിസ്ഥാനത്തില്‍ ജോലിചെയ്തിരുന്ന തൂപ്പുകാരിയെ പിരിച്ചുവിട്ട ഗസ്റ്റ്ഹൗസ് മാനേജര്‍ക്ക് സ്ഥലംമാറ്റം. വിനോദസഞ്ചാരവകുപ്പിന്റെ പൊന്മുടി ഗസ്റ്റ്ഹൗസിലാണ് സംഭവം. സ്ഥാപനത്തിലെ സ്ഥിര ജീവനക്കാര്‍ക്കെതിരെ കേസ് കൊടുത്തതിനെത്തുടര്‍ന്നായിരുന്നു തൂപ്പുകാരിയെ പിരിച്ചുവിട്ടത്.

തന്നോട് അപമര്യാദയായി പെരുമാറിയെന്ന് കാണിച്ചാണ് ഗസ്റ്റ്ഹൗസിലെ ഏതാനും ജീവനക്കാര്‍ക്കെതിരെ കഴിഞ്ഞ മാസം താത്കാലിക ജീവനക്കാരി പരാതിപ്പെട്ടത്. തുടര്‍ന്ന് ഇവരെ ജോലിയില്‍നിന്ന് പിരിച്ചുവിടുകയായിരുന്നു. സംഭവം വിവാദമായതിനെത്തുടര്‍ന്ന് മാനേജരെ കഴിഞ്ഞ ദിവസം ആറ്റിങ്ങല്‍ ഗസ്റ്റ്ഹൗസിലേക്ക് സ്ഥലംമാറ്റി. തിരുവനന്തപുരം യാത്രിനിവാസിലെ മാനേജര്‍ക്ക് പൊന്മുടി ഗസ്റ്റ്ഹൗസിന്റെ ചുമതലകൂടി നല്‍കുകയുംചെയ്തു.

വികസന സ്വപ്നങ്ങള്‍ക്ക് ചിറക് മുളയ്ക്കുന്ന പൊന്മുടിയില്‍ വിനോദസഞ്ചാരവകുപ്പിന്റെ ഗസ്റ്റ്ഹൗസിന് മുഴുവന്‍സമയ മാനേജര്‍ വേണമെന്ന് ആവശ്യമുയരുന്നുണ്ട്.