പാലോട്. സ്കൂള്‍ വിദ്യാര്‍ഥിയെ ഇടിച്ചു തെറിപ്പിച്ച ശേഷം കാര്‍ നിര്‍ത്താതെ കടന്നു. നന്ദിയോട് എസ്കെവി എച്ച്എസിലെ പത്താം ക്ളാസ് വിദ്യാര്‍ഥി ശരത്തി(15) നെയാണ് ഇടിച്ചിട്ടത്. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ച ശരത്തിന്റെ കാലിനു പൊട്ടലുള്ളതായി കണ്ടെത്തി. ഇന്നലെ വൈകിട്ട് ചെങ്കോട്ട റോഡില്‍ പ്ളാവറയിലായിരുന്നു സംഭവം. നെടുമങ്ങാട് നിന്ന് പാലോട് ഭാഗത്തേക്ക് അമിത വേഗത്തില്‍ വന്ന വെള്ള മാരുതി 800 കാറാണു നടന്നു പോകുകയായിരുന്ന വിദ്യാര്‍ഥിയെ ഇടിച്ചു തെറിപ്പിച്ചത്. നാട്ടുകാര്‍ ഓടിക്കൂടിയപ്പോഴേക്കും കാര്‍ നിര്‍ത്താതെ കടന്നു കളഞ്ഞു. വിവരമറിഞ്ഞ് പൊലീസ് പിന്നാലെ പോയെങ്കിലും കണ്ടെത്താനായില്ല. പൊലീസ് സ്റ്റേഷനുകളില്‍ സന്ദേശം നല്‍കിയിട്ടുണ്ട്. വിദ്യാര്‍ഥിയെ ആംബുലന്‍സില്‍ മെഡിക്കല്‍ കോളജ് ആശുപത്രിയില്‍ എത്തിക്കുകയായിരുന്നു
WELCOME
Showing posts with label മനോരമ. Show all posts
Showing posts with label മനോരമ. Show all posts
Friday, September 14, 2012
Thursday, July 5, 2012
വീട്ടില്‍ സ്ഫോടനം; ഒളിവില്‍ കഴിഞ്ഞ സിപിഎം അംഗം പിടിയിലായി
ആളപായമുണ്ടാകുന്ന തരത്തിലുള്ള സ്ഫോടകവസ്തുവാണു നിര്‍മിച്ചതെന്നു തെളിവെടുപ്പില്‍ കണ്ടെത്തിയിരുന്നു. വന്യമൃഗങ്ങളെ വേട്ടയാടുന്നതുമായി ബന്ധപ്പെട്ടു ബാബുരാജിനെതിരെ നേരത്തെ തന്നെ കേസുണ്ടെന്നു പൊലീസ് പറഞ്ഞു. സിഎംപി കൊല്ലം ജില്ലാ കമ്മിറ്റി അംഗമായിരുന്ന പ്രവീണ്‍ദാസിനെ കൊലപ്പെടുത്തിയ കേസിലെ അഞ്ചാം പ്രതിയാണു ബാബുരാജ്. ചല്ലിമുക്കില്‍ അടുത്തകാലത്തായി അനവധി സിപിഎം പ്രവര്‍ത്തകര്‍ പാര്‍ട്ടി വിട്ടു ബിജെപിയില്‍ ചേര്‍ന്നതുമായി ബന്ധപ്പെട്ട് ഇരു വിഭാഗങ്ങള്‍ തമ്മില്‍ സംഘര്‍ഷം നിലനിന്ന സാഹചര്യത്തില്‍ നടന്ന സ്ഫോടനം സംശയങ്ങള്‍ ജനിപ്പിച്ചിരുന്നു.
മാലിന്യം: നന്ദിയോട് ചന്ത പുഴുത്തുനാറുന്നു
Monday, June 25, 2012
അംഗന്‍വാടി കെട്ടിടം നവീകരിക്കാന്‍ അധികൃതര്‍ തയാറാവുന്നില്ലെന്ന് പരാതി
ഭരതന്നൂര്‍. തകര്‍ന്ന അംഗന്‍വാടിക്കെട്ടിടം നവീകരിക്കാന്‍ അധികൃതര്‍ തയാറാകുന്നില്ലെന്നു പരാതി. പ്രദേശവാസികള്‍ കന്നുകാലികളെ കെട്ടി തൊഴുത്തായി ഉപയോഗിക്കുന്നു. പാങ്ങോട് പഞ്ചായത്തിലെ മൈലമൂട് വാര്‍ഡിലെ വേലന്‍മുക്ക് 76-ാം നമ്പര്‍ അംഗന്‍വാടിയാണു നവീകരിക്കാന്‍ അധികൃതര്‍ മടിക്കുന്നത്.
1992 ഒക്ടോബറില്‍ പ്രവര്‍ത്തനം ആരംഭിച്ച അംഗന്‍വാടിയുടെ മേല്‍ക്കൂരയുടെ കഴുക്കോലുകള്‍ നശിച്ചതിനെത്തുടര്‍ന്ന് ഒടിഞ്ഞുതകര്‍ന്നു വീണ് ഒാടുകള്‍ നശിച്ച നിലയിലാണ്. കെട്ടിടത്തിന്റെ മേല്‍ക്കൂര അപകടാവസ്ഥയിലായതിനെത്തുടര്‍ന്നു നാട്ടുകാരുടെ പ്രതിഷേധത്തിനൊടുവില്‍ കുട്ടികളെ സമീപത്തെ വീടുകളില്‍ ഇരുത്തി അംഗവന്‍വാടി പ്രവര്‍ത്തിപ്പിച്ചുതുടങ്ങിയിട്ട് ഒരു വര്‍ഷമായി. ഇരുപത്തിയഞ്ചോളം കുട്ടികള്‍ ഇവിടെ പഠിക്കുന്നുണ്ട്.
ചെങ്കുത്തായ സ്ഥലത്തു വന്‍തോതില്‍ പാറ അടുക്കി ഉയര്‍ത്തിയാണു കെട്ടിട നിര്‍മാണം നടത്തിയിരിക്കുന്നത്. കെട്ടിടത്തിന്റെ പിന്‍ഭാഗത്ത് 30 അടിയോളം താഴ്ചയുള്ള താഴ്ന്ന സ്ഥലമാണ്. ഇവിടെ സംരക്ഷണഭിത്തിയില്ലാത്തതിനാല്‍ നാട്ടുകാര്‍ പരിഭ്രാന്തിയിലാണ്. കുട്ടികള്‍ക്കു കളിക്കുന്നതിനായി വന്‍തുക ചെലവാക്കി സ്ഥാപിച്ച ഉപകരണങ്ങള്‍ മുറ്റത്തു തുരുമ്പെടുത്തു നശിക്കുന്നു. ഇവിടെയാണു നാട്ടുകാര്‍ കന്നുകാലികളെ കെട്ടി കുളിപ്പിക്കുന്നതും തീറ്റുന്നതും. കന്നുകാലികളെ കുളിപ്പിക്കാന്‍ അംഗന്‍വാടിയിലെ കിണറ്റിലെ വെള്ളമാണ് ഉപയോഗിച്ചുവരുന്നത്.
അംഗന്‍വാടി
നവീകരിച്ചു സംരക്ഷിക്കണമെന്നാവശ്യപ്പെട്ട് അധികൃതര്‍ക്കു പരാതി നല്‍കിയിട്ടും നടപടിയെടുക്കാന്‍ തയാറാകുന്നില്ലെന്നു നാട്ടുകാര്‍ പറയുന്നു. തിരഞ്ഞെടുപ്പില്‍ പോളിങ് ബൂത്തായും ആരോഗ്യ പരിപാടികളുടെ പ്രവര്‍ത്ത സെന്ററായും പ്രവര്‍ത്തിക്കുന്ന അംഗന്‍വാടി അറ്റകുറ്റപ്പണികള്‍ നടത്തി പ്രവര്‍ത്തനം പുനരാരംഭിക്കണമെന്നാണു നാട്ടുകാരുടെ ആവശ്യം.
ചേന്നന്‍പാറയില്‍ ലോറി മറിഞ്ഞു; അപകടം ഒഴിവായി
വിതുര. ചേന്നന്‍പാറ ജോടെക് സെമിനാരിക്കു സമീപം വളവില്‍ റബര്‍ത്തടി കയറ്റിവന്ന ലോറി മറിഞ്ഞു. ഡ്രൈവര്‍ ചാടി രക്ഷപ്പെട്ടതിനാല്‍ ദുരന്തം ഒഴിവായി. റോഡില്‍ തെന്നിയാണ് അപകടം ഉണ്ടായത്. ഇവിടെ അടുത്തിടെ ബൈക്ക് മരത്തിലിടിച്ച് ഒരു യുവാവ് മരിച്ചിരുന്നു. ഏതാനും ദിവസം മുന്‍പു തെന്നൂര്‍ സൂര്യകാന്തിയില്‍ നിന്നു തടികയറ്റി ചെറ്റച്ചലിലേക്കു വന്ന ലോറി മറിഞ്ഞു പത്തു പേര്‍ക്കു പരുക്കേറ്റിരുന്നു.
Saturday, June 23, 2012
മണ്ണറ ബാലന്‍െറ നിര്യാണത്തില്‍ അനുശോചിച്ചു
വിതുര. കോണ്‍ഗ്രസ് നേതാവും ഡിസിസി അംഗവുമായിരുന്ന വിതുര മണ്ണറ അനിഴത്തില്‍ മണ്ണറ ആര്‍. ഭാസ്കരരന്‍നായരുടെ മകന്‍ മണ്ണറ ബാലകൃഷ്ണന്‍നായരുടെ(മണ്ണറ ബാലന്‍) നിര്യാണത്തില്‍ വിവിധ രാഷ്ട്രീയകക്ഷി നേതാക്കള്‍ അനുശോചനം രേഖപ്പെടുത്തി. കെപിസിസി അംഗം, പഞ്ചായത്തംഗം, മണ്ഡലം പ്രസിഡന്റ്, ചായം സഹകരണ ബാങ്ക് സെക്രട്ടറി, നെറ്റ്കോസ് ഡയറക്ടര്‍ എന്നീ നിലകളില്‍ പ്രവര്‍ത്തിച്ച മണ്ണറ ബാലന്‍ വിതുര മേഖലയില്‍ കോണ്‍ഗ്രസ് പ്രസ്ഥാനം കെട്ടിപ്പടുക്കുന്നില്‍ നിസ്തുല പങ്കു വഹിച്ചിട്ടുണ്ട്.
കെ. കരുണാകരന്‍ ഡിഐസി രൂപീകരിച്ചപ്പോള്‍ ഒപ്പം ചേര്‍ന്നെങ്കിലും പിന്നീടു കോണ്‍ഗ്രസില്‍ മടങ്ങിയെത്തി. സ്പീക്കര്‍ ജി. കാര്‍ത്തികേയന്‍, പാലോട് രവി എംഎല്‍എ, മുന്‍ എംപി തലേക്കുന്നില്‍ ബഷീര്‍, ജില്ലാ പഞ്ചായത്ത് പ്രസിഡന്റ് രമണി പി. നായര്‍, കരകുളം കൃഷ്ണപിള്ള എന്നിവരും അനവധി പ്രദേശികനേതാക്കളും അന്ത്യോപചാരമര്‍പ്പിക്കാന്‍ എത്തിയിരുന്നു.
മണ്ഡലം പ്രസിഡന്റ് വി. അനിരുദ്ധന്‍നായരുടെ അധ്യക്ഷതയില്‍ കലുങ്ക് ജംക്ഷനില്‍ കൂടിയ അനുശോചന യോഗത്തില്‍ സി.എസ്. വിദ്യാസാഗര്‍, പി.എസ്. പ്രശാന്ത്, വി.കെ. മധു, പി.സി. ജനാര്‍ദനന്‍, പി. ബാലകൃഷ്ണന്‍നായര്‍, മസൂദ്, എന്‍. ജയമോഹനന്‍, പി. പുഷ്പാംഗദന്‍, ശ്രീകണ്ഠന്‍നായര്‍, എസ്. കുമാരപിള്ള, മാന്‍കുന്നില്‍ പ്രകാശ്, കെ. വിജയകുമാര്‍, ലാല്‍റോഷിന്‍, എസ്.എന്‍. ക്ളമന്റ്്, എം.എസ്. സെല്‍വന്‍, ഡി. അജയകുമാര്‍ തുടങ്ങിവര്‍ അനുശോചിച്ചു. മണ്ണറ ബാലന്‍െറ സഞ്ചയനം നാളെ രാവിലെ ഒന്‍പതിനു നടക്കും.
Sunday, June 17, 2012
പച്ചപ്പിന്റെ പറുദീസയായി വെങ്കിട്ടമൂട് ആദിവാസി ഗ്രാമം
പാലോട്. കാട്ടാനകളടക്കമുള്ള വന്യജീവികളുടെ വിഹാരകേന്ദ്രമായിട്ടും അതൊക്കെ അതിജീവിച്ചു പരിസ്ഥിതി സംരക്ഷണത്തിന്റെയും കൃഷി മാഹാത്മ്യത്തിന്റെയും പച്ചപ്പിന്റെ കാഴ്ചയാണു പെരിങ്ങമ്മല പഞ്ചായത്തിലെ ആദിവാസി ഉള്‍ഗ്രാമമായ വെങ്കിട്ടമൂട്. അന്തരിച്ച ആദിച്ചന്‍ കാണിയുടെ മക്കളുടെ അഞ്ചു കുടുംബങ്ങളാണ് ഈ കൊച്ചുഗ്രാമത്തില്‍ കഴിയുന്നത്.
ഗ്രാമത്തെ പച്ചപ്പണിയിച്ചുകൊണ്ട് ഇല്ലാത്ത വിളകള്‍ ചുരുക്കം. നാട്ടിന്‍പുറങ്ങളില്‍ നിന്നൊക്കെ അന്യമായ കാച്ചിലിന്റെ വള്ളികള്‍ പടര്‍ന്നുപന്തലിച്ചും ചേമ്പും ചേനയും കൂവക്കിഴങ്ങും മരച്ചീനിയും കവുങ്ങും മാവും വെറ്റിലയും ഒക്കെ തഴച്ചുവളരുന്നു. ഇപ്പോഴിതാ കൃഷി വകുപ്പിന്റെയും ബ്ളോക്ക് പഞ്ചായത്തിന്റെയും നേതൃത്വത്തില്‍ ഒരു ഹെക്ടര്‍ ഭൂമിയില്‍ കരനെല്ലു കൃഷിയും ആരംഭിച്ചു. ഇവര്‍ ഭംഗിയായി കൃഷി നോക്കിനടത്തും എന്ന ബോധ്യം തന്നെയാണ് ഈ കുഗ്രാമത്തെ കരനെല്ലിനു തിരഞ്ഞെടുത്തതും.
കൃഷിവിളകള്‍ക്കു പുറമെ ചെടികളാലും സമൃദ്ധമാണിവിടം. ഈറക്കുടിലുകളുടെ ചുറ്റും ചെടികളുടെ സാന്നിധ്യം കാഴ്ചയാവുന്നതാണ്. ഗ്രാമത്തെ പച്ചപ്പണിയിക്കാന്‍ ഇവരുടെ ത്യാഗം ചില്ലറയല്ല. വന്യമൃഗങ്ങളെ തുരത്താന്‍ ഏറുമാടങ്ങള്‍ കെട്ടിയാണു കാവലിരുപ്പ്. ഉല്‍പന്നങ്ങള്‍ വിപണിയിലെത്തിക്കാന്‍ നന്നേ വിയര്‍പ്പൊഴുക്കേണ്ടിവരും. മൂന്നു കിലോമീറ്റര്‍ കൊടുംവനം താണ്ടി മങ്കയത്തെത്തി ഏറ്റവും അടുത്ത വിപണിയായ പെരിങ്ങമ്മലയിലെത്തണം.
ഇതൊക്കെയാണെങ്കിലും
ഇവിടെ ഒരു കുടുംബത്തിനും കക്കൂസോ കിണറോ ഇല്ല. കാട്ടരുവിയിലെ വെള്ളമാണ് ഇവര്‍ ഉപയോഗിക്കുന്നത്. എന്നാല്‍ കഴിഞ്ഞ ദിവസം നടന്ന കരനെല്ല് കൃഷിയുടെ ഉദ്ഘാടനവേളയില്‍ ഇവരുടെ പ്രശ്നങ്ങള്‍ അനുഭാവപൂര്‍വം പരിഗണിക്കാമെന്ന പ്രഖ്യാപനം ഇവര്‍ക്ക് ആശ്വാസം നല്‍കുന്നുണ്ട്.
Monday, June 11, 2012
സര്‍ക്കാര്‍ ആശുപത്രിയെ കമ്യൂണിറ്റി ഹെല്‍ത്ത് സെന്ററായി ഉയര്‍ത്തി രണ്ടുവര്‍ഷം കഴിഞ്ഞിട്ടും ശനിദശ മാറുന്നില്ല
പാലോട്. സര്‍ക്കാര്‍ ആശുപത്രിയെ കമ്യൂണിറ്റി ഹെല്‍ത്ത് സെന്ററായി ഉയര്‍ത്തി രണ്ടുവര്‍ഷം കഴിഞ്ഞിട്ടും ശനിദശ മാറുന്നില്ല. ഉച്ചകഴിഞ്ഞാല്‍ ഡോക്ടര്‍മാരില്ലാത്തതാണ് ഇവിടെ രോഗികള്‍ നേരിടുന്ന ബുദ്ധിമുട്ട്. അഞ്ചു ഡോക്ടര്‍മാര്‍ ഉള്ളതില്‍ ഒരു ഡോക്ടര്‍ക്ക് 'ജോലി അവിടെയും കൂലി ഇവിടെയും എന്നതാണു സ്ഥിതി. ഒരു ലേഡി ഡോക്ടര്‍ വര്‍ക്ക് അറേജ്മെന്റില്‍ തൈക്കാട് ആശുപത്രിയിലാണു ജോലി നോക്കുന്നത്. എന്നാല്‍ ഡ്യൂട്ടി പാലോട് ആശുപത്രിയിലാണ്. ഇതുമൂലം ഇവിടെ പുതിയ നിയമനം നടത്താനും കഴിയുന്നില്ല.
ബാക്കി നാലു ഡോക്ടര്‍മാരുടെ ഡ്യൂട്ടി ഒരു മണിക്കു തീരും. പിന്നെയെത്തുന്ന രോഗികള്‍ക്ക് ഒന്നുകില്‍ താലൂക്ക് ആശുപത്രിയിലൊ ഡോക്ടര്‍മാരുടെ സ്വകാര്യ റൂമിലോ എത്തണം. നിത്യേന 500ലേറെ രോഗികള്‍ ചികില്‍സ തേടിയെത്തുന്നുണ്ട്. കിടത്തി ചികില്‍സയില്‍ നൂറോളം രോഗികളുമുണ്ട്. ഇത്രയും രോഗികള്‍ ആശ്രയിക്കുന്ന മലയോര മേഖലയിലെ ആശുപത്രിയായിട്ടും വേണ്ടത്ര സൌകര്യങ്ങള്‍ ഒരുക്കുന്ന കാര്യത്തില്‍ തികഞ്ഞ അവഗണനയാണു ഫലം.
സിഎച്ച്സിയായി ഉയര്‍ത്തുമ്പോള്‍ ഒരു സിവില്‍ സര്‍ജന്‍ അടക്കം ഒന്‍പതു ഡോക്ടര്‍മാരും അതിനുവേണ്ട മറ്റ് ക്ളെറിക്കല്‍ സ്റ്റാഫുകളും വേണം മാത്രമല്ല മുഴുവന്‍ സമയ ഡോക്ടര്‍മാരുടെ സേവനവും ലഭ്യമാക്കേണ്ടതാണ്. എന്നാല്‍ കഴിഞ്ഞ ലിസ്റ്റില്‍ സിഎച്ച്സിയായി ഉയര്‍ത്തിയ ആശുപത്രികളില്‍ സ്റ്റാഫ് പാറ്റേണ്‍ നിലവില്‍ വന്നിട്ടില്ലെന്നാണ് ആരോഗ്യ വകുപ്പ് അധികൃതര്‍ പറയുന്നത്. ഇവിടെ ജനപ്രതിനിധികളും
ത്രിതല പഞ്ചായത്തുകളുമൊക്കെ ചേര്‍ന്ന് അശാസ്ത്രിയമായ കുറെ കെട്ടിടങ്ങള്‍ നിര്‍മിച്ചുവെങ്കിലും നിലവില്‍ പുരുഷന്‍മാരുടെ വാര്‍ഡ് അപകട നിലയിലാണ്.
ആശുപത്രിയുടെ തുടക്കക്കാലത്തു നിര്‍മിച്ച കെട്ടിടം ചുവരുകള്‍ വിള്ളല്‍ വീണും ഓടുകള്‍ പൊട്ടി ചോര്‍ന്നും ബലക്ഷയത്തിലാണ്. പ്രസവ വാര്‍ഡിനായി നിര്‍മിച്ച കെട്ടിടം വെറുതെ കിടക്കുന്നു. ആശുപത്രിയുടെ ചുമതലയുള്ള ബ്ളോക്ക് പഞ്ചായത്തും എച്ച്എംസി കമ്മിറ്റിയും അടിയന്തരമായി ഇടപ്പെട്ട് സിഎച്ച്സിയുടെ സൌകര്യങ്ങള്‍ പൂര്‍ണമായും നടപ്പിലാക്കാന്‍ നടപടി സ്വീകരിക്കണമെന്ന ആവശ്യം ശക്തമായിട്ടുണ്ട്.
ഇടവപ്പാതി കനിയുന്നില്ല:കുടിവെള്ള ക്ഷാമം രൂക്ഷമാകുന്നു
വിതുര. ഇടവ മാസം അവസാനിക്കാറായിട്ടും ശക്തമായി മഴ പെയ്യാത്തതുമൂലം കുടിവെള്ളക്ഷാമം രൂക്ഷമാകുന്നു. അതികഠിനമായ ചൂടുമൂലം നീരുറവകളും നീര്‍ച്ചാലുകളും മറ്റും മാസങ്ങളായി വറ്റിവരണ്ടു കിടക്കുകയാണ്. ഭൂരിഭാഗം കിണറുകളില്‍നിന്നും ജലം അപ്രത്യക്ഷമായി കഴിഞ്ഞു. നദികളിലും ജലനിരപ്പു ഗണ്യമായി കുറഞ്ഞു. ഇടയ്ക്കു വേനല്‍മഴ പെയ്തെങ്കിലും ജലക്ഷാമത്തിനു പരിഹാരമായില്ല. തുലാമാസത്തിലാണു ശക്തമായ മഴ പെയ്തത്. തുലാവര്‍ഷം കഴിഞ്ഞിട്ട് ആറുമാസം പിന്നിട്ടെങ്കിലും മഴ കനിയാത്തതു കര്‍ഷകര്‍ക്കും മറ്റും കനത്ത ആഘാതമായിരിക്കുകയാണ്.
വേനല്‍ച്ചൂടിന്‍െറ തീഷ്ണത മൂലം കൃഷികളും മറ്റും വ്യാപകമായി ഉണങ്ങി നശിച്ചു. കടുത്ത വേനല്‍ കര്‍ഷകര്‍ക്കു കനത്ത നാശനഷ്ടമാണു വിതച്ചിരിക്കുന്നത്. കഴിഞ്ഞ വര്‍ഷത്തെക്കാള്‍ ഇക്കുറി ചൂടിന്‍െറ തീവ്രത വര്‍ധിച്ചതായി കര്‍ഷകര്‍ പറയുന്നു. വെള്ളം ലഭ്യമല്ലാത്തതുമൂലം മിക്കവര്‍ക്കും കൃഷിയിറക്കാനും സാധിച്ചിട്ടില്ല. എങ്ങും ചൂടിന്‍െറ തീവ്രതയും ജലക്ഷാമവുമാണു ചര്‍ച്ചാവിഷയം. ചൂടു ക്രമാതീതമായി ഉയര്‍ന്നതോടെ വൈദ്യുതി ഉപഭോഗവും ഗണ്യമായി വര്‍ധിച്ചു. ഫാന്‍, എസി വില്‍പനയും കുത്തനെ കൂടി. ഫാനില്ലാതെ ഉറങ്ങാന്‍ കഴിയാത്ത സ്ഥിതിയായി.
സൂര്യാഘാതമേറ്റു പൊള്ളലേറ്റ സംഭവവും, പശുക്കള്‍ കുഴഞ്ഞുവീണ സംഭവവും ഉണ്ടായി. കുടിവെള്ള ക്ഷാമം രൂക്ഷമായതിനെ തുടര്‍ന്നു ചില പഞ്ചായത്തുകളില്‍ ടാങ്കര്‍ലോറികളില്‍ ശുദ്ധജല വിതരണം നടത്തിയെങ്കിലും ഒരാഴ്ച പിന്നിട്ടപ്പോള്‍ നിര്‍ത്തി. നദിയില്‍
ജലനിരപ്പു താഴ്ന്നതു കുടിവെള്ള വിതരണത്തെ പ്രതികൂലമായി ബാധിച്ചിട്ടുണ്ട്. മിക്ക പ്രദേശത്തും ഡാമുകളില്‍നിന്നും മറ്റും ടാങ്കര്‍ ലോറിയില്‍ കുടിവെള്ളം ശേഖരിച്ചാണ് ഉപയോഗിക്കുന്നത്. വിതുര പഞ്ചായത്തിലെ പോറ്റിക്കുന്ന്, ആറ്റിന്‍പുറം, ലക്ഷംവീട്, തൊളിക്കോട് പഞ്ചായത്തിലെ ഉണ്ടപ്പാറ, തേക്കുംമൂട്, പച്ചമല പ്രദേശത്തുകാര്‍ ശുദ്ധജലത്തിനായി നെട്ടോട്ടമോടുകയാണ്.
പ്രദേശത്തെ എല്ലാ ജലസ്രോതസുകളും വറ്റിവരണ്ടിട്ടിട്ടു മാസങ്ങളായി. പൈപ്പുജല വിതരണം കൂടി അടിക്കടി തടസ്സപ്പെട്ടതു ഗ്രാമവാസികള്‍ക്ക് ആഘാതമായി. കിലോമീറ്ററുകളോളം നടന്നു നദിയില്‍നിന്നു ജലം ശേഖരിച്ചുകൊണ്ടുവന്ന് ഉപയോഗിക്കേണ്ട സ്ഥിതിയാണു നിലവില്‍. അനിയന്ത്രിതമായ മണലൂറ്റുമൂലം വാമനപുരം നദി വറ്റിവരണ്ടു. നദിയുടെ മിക്കഭാഗത്തും മണല്‍കുഴികളില്‍ മലിനജലം കെട്ടിക്കിടക്കുകയാണ്. നീരൊഴുക്കു ഗണ്യമായി കുറഞ്ഞതോടെ നദിയുടെ ചില ഭാഗങ്ങള്‍ നിശ്ചലമായി കിടക്കുന്നു. ജലക്ഷാമം അതിരൂക്ഷമായതോടെ നദിയിലെ മലിനജലം ഉപയോഗിക്കേണ്ട അവസ്ഥയാണെന്നു നാട്ടുകാര്‍ പരാതിപ്പെട്ടു.
കല്ലാറിലേക്കു വനത്തില്‍നിന്ന് ഒഴുകിയെത്തിയിരുന്ന വെള്ളച്ചാട്ടങ്ങളും മെലിഞ്ഞുണങ്ങി. ചില വെള്ളച്ചാട്ടങ്ങള്‍ അപ്രത്യക്ഷമാകുകയും ചെയ്തു. ആദിവാസിമേഖലയിലെ സ്ഥിതിയും വിഭിന്നമല്ല. പേപ്പാറ ഡാമിലും ജലനിരപ്പു കുറഞ്ഞു. വനാന്തരങ്ങളിലും ചൂടു വ്യാപിച്ചതോടെ കാട്ടുമൃഗങ്ങള്‍ നാട്ടിലിറങ്ങി ശല്യം തുടങ്ങി. വനത്തിലും കഠിനമായ ജലക്ഷാമം നേരിടുന്നതായി ആദിവാസികള്‍ പറഞ്ഞു. പേപ്പാറ ഡാമില്‍ വെള്ളം കുടിക്കാന്‍ എത്തുന്ന ആനകളുടെ എണ്ണവും വര്‍ധിച്ചു. ജൂണ്‍ മാസം പകുതിയാകുമ്പോഴെങ്കിലും മഴ തിമര്‍ത്തുപെയ്യുമെന്ന പ്രതീക്ഷയില്‍ വേഴാമ്പലിനെപ്പോലെ കാത്തിരിക്കുകയാണു കര്‍ഷകരും മറ്റും.
Saturday, June 9, 2012
പേവിഷബാധയേല്‍ക്കുന്നവരുടെ എണ്ണം പെരുകുന്നു
പാലോട്. തെരുവുനായ്ക്കള്‍ ക്രമാതീതമായി പെരുകുകയും അവയെ നിയന്ത്രിക്കാനുള്ള നടപടികളില്ലാത്തതുംമൂലം ഗ്രാമങ്ങളില്‍ പേവിഷബാധയേല്‍ക്കുന്നവരുടെ എണ്ണം പെരുകുന്നു. കുട്ടികളടക്കം ഇന്ന് അനവധി പേര്‍ ചികില്‍സയിലാണ്. പാലോട് സര്‍ക്കാര്‍ സിഎച്ച്സിയില്‍ 80 പേര്‍ ഇപ്പോള്‍ ചികില്‍സയിലാണ്. പലപ്പോഴും കുത്തിവയ്പിനുള്ള മരുന്ന് തികയാത്ത അവസ്ഥയാണ്. മാത്രമല്ല പാലോട് ആശുപത്രിയും പരിസരവും നായ്ക്കളുടെ പിടിയിലുമാണ്.
ഇവിടെയെത്തുന്ന രോഗികള്‍ക്കിടയിലൂടെ നായ്ക്കള്‍ തലങ്ങും വിലങ്ങും സഞ്ചരിക്കുന്നതു ബദ്ധിമുട്ട് സൃഷ്ടിക്കുന്നുണ്ട്. ഉച്ചകഴിഞ്ഞാല്‍ പിന്നെ നായ്ക്കളുടെ വിശ്രമകേന്ദ്രമാകുകയാണ് ആശുപത്രി. വാര്‍ഡുകളില്‍ വരെ കടന്നുചെല്ലുന്ന നായ്ക്കള്‍ ഉയര്‍ത്തുന്ന ഭീഷണി ചെറുതല്ല. നന്ദിയോട്, പെരിങ്ങമ്മല മാര്‍ക്കറ്റുകളും നായ്ക്കളെക്കൊണ്ടു നിറഞ്ഞതായി പരാതിയുണ്ട്. മറ്റു പൊതു സ്ഥലങ്ങളിലും നായ്ക്കള്‍ ജനത്തിനു ബുദ്ധിമുട്ട് സൃഷ്ടിക്കുകയാണ്. പഞ്ചായത്തുകള്‍ക്ക് ഇവയെ കൊല്ലാനോ പിടിക്കാനോ നിയമമില്ലത്രെ.
എന്നാല്‍ വന്ധ്യംകരണം നടത്താം. അതു മൃഗാശുപത്രി മുഖേനയാണു നടത്തേണ്ടത്. അതു പോലും ഇപ്പോള്‍ നടക്കുന്നില്ലെന്നു പരാതിയുണ്ട്. നന്ദിയോട് സ്കൂളില്‍ കയറി കുട്ടികളെ കടിച്ച സംഭവംവരെ അടുത്തകാലത്ത് ഉണ്ടായിട്ടും അധികൃതരുടെ കണ്ണു തുറപ്പിക്കാന്‍ പര്യാപ്തമായില്ല. ജനത്തിനു ഭീഷണി ഉയര്‍ത്തുന്ന നായ്ക്കളെ നിയന്ത്രിക്കാന്‍ സര്‍ക്കാര്‍ ഇടപെട്ടു നടപടി സ്വീകരിക്കണമെന്ന ആവശ്യം വ്യാപകമായിട്ടുണ്ട്.
പാലോട് പൊലീസ് സ്റ്റേഷനില്‍ അവാര്‍ഡ് ദാനം സംഘടിപ്പിച്ചു
ആക്ഷന്‍ കൌണ്‍സില്‍ രൂപീകരിച്ചു
ഭരതന്നൂര്‍ . വനമേഖലയിലെ ജനവാസകേന്ദ്രങ്ങളില്‍ അക്കേഷ്യ, മാഞ്ചിയം എന്നിവ നട്ടുപിടിപ്പിക്കാനുള്ള നീക്കത്തിനെതിരെ പ്രദേശവാസികളുടെ നേതൃത്വത്തില്‍ ധര്‍ണ നടത്തുകയും ആക്ഷന്‍ കൌണ്‍സില്‍ രൂപീകരിക്കുകയും ചെയ്തു. പാലോട് ഫോറസ്റ്റ് റേഞ്ച് ഒാഫിസിന്റെ പരിധിയിലുള്ള കൊച്ചാലുംമൂട് കിഴക്കേറോഡ്,കാഞ്ചിനട, ഗാര്‍ഡ് സ്റ്റേഷന്‍ എന്നിവിടങ്ങളിലാണു രണ്ടാമതും തൈകള്‍ വച്ചുപിടിപ്പിക്കാന്‍ നീക്കം നടക്കുന്നത്.
പ്രദേശങ്ങളില്‍ കുടിവെള്ളക്ഷാമത്തിനു പുറമെ ശ്വാസകോശ രോഗങ്ങള്‍ വര്‍ധിക്കുകയാണെന്നും ഇവിടെ തൈകള്‍ നടന്നതിനുപകരം ഒൌഷധച്ചെടികള്‍ നടണമെന്നും ജില്ലാ പഞ്ചായത്ത് ബന്ധപ്പെട്ടവര്‍ക്കു നിവേദനം നല്‍കിയെങ്കിലും നടപടിയെടുക്കുന്നില്ലെന്നും വന്‍തോതില്‍ പ്രദേശത്തു തൈകള്‍ നടുന്നതിനായി എത്തിച്ചുവെന്നും നാട്ടുകാര്‍ പറയുന്നു.
പി.എം.റഹിം (ചെയര്‍മാന്‍),സലാഹുദ്ദീന്‍(കണ്‍വീനര്‍)എന്നിവരുടെ നേതൃത്വത്തില്‍ ആക്ഷന്‍ കൌണ്‍സില്‍ രൂപീകരിക്കുകയും ശക്തമായ സമരപരിപാടികള്‍ നടത്താന്‍ തീരുമാനിക്കുകയും ചെയ്തു
ജഴ്സിഫാം ബസ് ചാത്തന്‍കോട് വരെ നീട്ടണം
വിതുര. ആദിവാസി വിദ്യാര്‍ഥികളുടെയും മറ്റും യാത്രാസൌകര്യം കണക്കിലെടുത്തു വിതുര കെഎസ്ആര്‍ടിസി ഡിപ്പോയില്‍ നിന്നു ജഴ്സിഫാം വരെ സര്‍വീസ് നടത്തുന്ന ബസുകള്‍ ചാത്തന്‍കോട് വരെ നീട്ടണമെന്ന് ആദിവാസി മഹാസഭ സംസ്ഥാന കമ്മിറ്റി ആവശ്യപ്പെട്ടു. ചാത്തന്‍കോട്,ചെമ്മാംകാല,വലിയകാല പ്രദേശത്തു കാട്ടാനശല്യം വര്‍ധിച്ചിരിക്കുകയാണ്.
സ്കൂള്‍വിട്ടു കാട്ടാനകള്‍ താണ്ഡവമാടുന്ന ഘോരവനത്തിലൂടെ നാലു കിലോമീറ്റര്‍ നടന്നാണു വിദ്യാര്‍ഥികള്‍ക്കു വീട്ടിലെത്തേണ്ടത്്. ഇപ്പോള്‍ വിതുര ഡിപ്പോയില്‍ നിന്നു രണ്ടു സര്‍വീസുകളാണു ചാത്തന്‍കോട്ടേക്കുള്ളത്. ബസ് സര്‍വീസ് നീട്ടിയാല്‍ കുട്ടികള്‍ക്കു രാത്രിയാകുംമുന്‍പു വീട്ടിലെത്താന്‍ കഴിയും. ആവശ്യം ഉന്നയിച്ച് എഎംഎസ് സെക്രട്ടറി എം.നാരായണന്‍ മന്ത്രിക്കും വിതുര ഡിപ്പോയിലും നിവേദനം നല്‍കി.
Thursday, June 7, 2012
അംഗന്‍വാടി മന്ദിരം ഉദ്ഘാടനം ചെയ്തു
നന്ദിയോട്. പഞ്ചായത്ത് ആലുംമൂട്ടില്‍ പണികഴിപ്പിച്ച അംഗന്‍വാടി മന്ദിരത്തിന്റെ ഉദ്ഘാടനം പ്രസിഡന്റ് ശൈലജാ രാജീവന്‍ നിര്‍വഹിച്ചു. വൈസ് പ്രസിഡന്റ പി.എസ്. ബാജിലാലിന്റെ അധ്യക്ഷതയില്‍ ബ്ളോക്ക് ആരോഗ്യകാര്യ സ്റ്റാന്‍ഡിങ് കമ്മിറ്റി ചെയര്‍പഴ്സന്‍ ഉഷാവിജയന്‍, അംഗം മഞ്ചു മധുസൂദനന്‍, പഞ്ചായത്ത് ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ കെ.സി. ബാബു, വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പഴ്സന്‍ എ. സുജാത, വികസനകാര്യ സ്റ്റാന്‍ഡിങ് കമ്മിറ്റി ചെയര്‍പഴ്സന്‍ പി.ആര്‍. സുമ, പഞ്ചായത്ത് അംഗങ്ങളായ ടി.കെ. വേണുഗോപാല്‍, ഉദയകുമാര്‍, ജി. പ്രകാശ്, സിഡിപിഒ: ഷീല, സൂപ്പര്‍വൈസര്‍ ഷീജ, സ്വാഗത സംഘം ചെയര്‍മാന്‍ ബി.എസ്. രമേശന്‍, എന്‍. മോഹനന്‍, കെ.ആര്‍. മോഹനന്‍പിള്ള, എ. രത്നാകരന്‍, അംഗന്‍വാടി ടീച്ചര്‍ ശോഭ എന്നിവര്‍ പ്രസംഗിച്ചു.
Monday, June 4, 2012
നെയ്യപ്പള്ളി ആയിരവില്ലി ക്ഷേത്രത്തില്‍ ഉല്‍സവം നാളെ
പാലോട്. നെയ്യപ്പള്ളി ആയിരവില്ലി തമ്പുരാന്‍ ക്ഷേത്രത്തിലെ ഉല്‍സവം നാളെ നടക്കും. രാവിലെ അഞ്ചിന് നിര്‍മാല്യം, മലര്‍ നിവേദ്യം, ദീപാരാധന. ആറിന് ഗണപതിഹോമം, ഏഴിന് ഉഷപൂജ, 7.30ന് മൃത്യുഞ്ജയഹോമം, 8.30ന് ഭാഗവത പാരായണം, ചെണ്ടമേളം, 9.30ന് പൊങ്കാല, 12.30ന് അന്നദാനം, അഞ്ചിന് ഐശ്വര്യപൂജ, 6.30ന് അലങ്കാര ദീപാരാധന, ഏഴിന് ഭഗവതി സേവ, എട്ടിന് പുഷ്പാഭിഷേകം, ഒന്‍പതിന് പൂത്തിരിമേള.
എസ്എന്‍ഡിപി ശാഖ കൌണ്‍സലിങ് ക്ളാസ്നടത്തി
വിതുര. എസ്എന്‍ഡിപി വിതുര ശാഖയുടെ നേതൃത്വത്തില്‍ കൌമാരപ്രായക്കാര്‍ക്കായി കൌണ്‍സലിങ് ക്ളാസ് സംഘടിപ്പിച്ചു. ശാഖാപ്രസിഡന്റ് എസ്. സജികുമാറിന്റെ അധ്യക്ഷതയില്‍ വിതുരപഞ്ചായത്ത്പ്രസിഡന്റ് എല്‍.വി. വിപിന്‍ ഉദ്ഘാടനം ചെയ്തു. വിതുര എഎസ്ഐ: സതീശന്‍, യൂണിയന്‍പ്രസിഡന്റ് കെ. കരുണാകരന്‍, സെക്രട്ടറി പരുത്തിപ്പള്ളി സുരേന്ദ്രന്‍, എന്‍. സുര്‍ശനന്‍, എസ്. അജയകുമാര്‍, എസ്. പ്രവീണ്‍കുമാര്‍, ജി. ഷിന്തുലാല്‍, സി. പ്രസന്നകുമാരി, പി.കെ. രമണി, എസ്. ജയശ്രീ, വി. ബിന്ദു, എസ്. ജയേഷ്, വി. ശ്രീജിത്, വി. ദിനുമോന്‍, എ. രാധാകൃഷ്ണന്‍ എന്നിവര്‍ പ്രസംഗിച്ചു. ഡോ. ശാന്താ യേശുദാസ്, ക്രിസ്റ്റഫര്‍ ജോണ്‍ എന്നിവര്‍ ക്ളാസെടുത്തു.
സ്കൂളുകള്‍ അണിഞ്ഞൊരുങ്ങി: പ്രവേശനോല്‍സവം ഇന്ന്
പാലോട്. സര്‍ക്കാര്‍ സ്കൂളുകളില്‍ കുട്ടികളില്ലെന്ന പരിഭവങ്ങള്‍ക്കിടയില്‍ പെരിങ്ങമ്മല ഗവ. യുപിഎസില്‍ ഇന്നലെ വരെ ഒന്നാം ക്ളാസില്‍ 101 കുട്ടികള്‍ അഡ്മിഷന്‍ നേടിയതു ശ്രദ്ധേയമായി. 109 വര്‍ഷം പഴക്കമുള്ള സ്കൂളില്‍ ഒരുപക്ഷേ വരുംദിവസങ്ങളില്‍ 109 തികയ്ക്കാനാകുമെന്ന പ്രതീക്ഷയിലാണ് അധ്യാപകര്‍. വിപുലമായ പ്രവേശനോല്‍സവമാണ് ഇവിടെ ഒരുക്കിയിരിക്കുന്നത്. ചെണ്ടമേളത്തിന്റെ അകമ്പടിയോടെ രാവിലെ കുട്ടികളെ വരവേല്‍ക്കും. തുടര്‍ന്ന് അഡ്മിഷന്‍ നേടിയ നൂറു കുട്ടികള്‍ നൂറു ദീപം തെളിക്കും. സമ്മാനക്കിറ്റ് വിതരണവും പാഠപുസ്തക വിതരണവും നടക്കും.
വിതുര. അറിവിന്‍െറ ആദ്യക്ഷരം തേടിയെത്തുന്ന കുരുന്നുകളെ വരവേല്‍ക്കാന്‍ സ്കൂളുകള്‍ അണിഞ്ഞൊരുങ്ങി. സ്കൂളും പരിസരവും മറ്റും വൃത്തിയാക്കി തോരണവും കുരുത്തോലയും കെട്ടി അലങ്കരിച്ചു. ചിരിച്ചും കരഞ്ഞും ചിണുങ്ങിയും രക്ഷാകര്‍ത്താക്കളുടെ കൈപിടിച്ചെത്തുന്ന കുരുന്നുകള്‍ക്കു മിഠായിയും വര്‍ണ ബലൂണുകളും സമ്മാനങ്ങളും നല്‍കി വരവേല്‍ക്കും. സര്‍ക്കാര്‍ സ്കൂളുകളും സ്വകാര്യ സ്കൂളുകളും വൈവിധ്യമാര്‍ന്ന പരിപാടികളോടെയാണു പ്രവേശനോല്‍സവം സംഘടിപ്പിച്ചിരിക്കുന്നത്. വിളംബര ഘോഷയാത്രയാണു മുഖ്യയിനം.
മലയോര മേഖലയിലെ മിക്ക സര്‍ക്കാര്‍ സ്കൂളുകളിലും ഇക്കുറി ഒന്നാം ക്ളാസില്‍ അഡ്മിഷന്‍ തേടിയെത്തിയ കുട്ടികളുടെ എണ്ണം വര്‍ധിച്ചിട്ടുണ്ട്. സ്വകാര്യ സ്കൂളുകളിലെ സ്ഥിതിയും വിഭിന്നമല്ല. വിതുര ഗവ. യുപിഎസിലെ പ്രവേശനോല്‍സവം പിടിഎ പ്രസിഡന്റ് കെ. വിനീഷ് കുമാറിന്റെ അധ്യക്ഷതയില്‍ പഞ്ചായത്ത് പ്രസിഡന്റ് എല്‍.വി. വിപിന്‍ ഉദ്ഘാടനം ചെയ്യും. വിളംബര ഘോഷയാത്ര, മധുര വിതരണം, കലാപരിപാടികള്‍ എന്നിവ ഉണ്ടാകും. ആനപ്പാറ, ചായം, ചെറ്റച്ചല്‍, പൊന്മുടി, കല്ലാര്‍, ബോണക്കാട്, വലിയവേങ്കാട്, മേമല, മണലയം, തലത്തൂതക്കാവ്, മീനാങ്കല്‍, പനക്കോട് സ്കൂളുകളിലും പ്രവേശനോല്‍സവം സംഘടിപ്പിച്ചിട്ടുണ്ട്.
സൈനുദീന്റെ മരണത്തില്‍ അനുശോചിച്ചു
പാലോട്. കോണ്‍ഗ്രസ് നേതാവ് പെരിങ്ങമ്മല മണ്ണാന്തല കിഴക്കുംകര പുത്തന്‍വീട്ടില്‍ സൈനുദ്ദീന്റെ നിര്യാണം പൊതുരംഗത്തിനു നഷ്ടമായി. കോണ്‍ഗ്രസ് രാഷ്ട്രീയരംഗത്ത് ആത്മാര്‍ഥതയുടെ പ്രതീകമായി നിലകൊണ്ട സൈനുദ്ദീന് കക്ഷിരാഷ്ട്രീയത്തിനതീതമായി ഏതാവശ്യത്തിനും ഓടിയെത്തുന്ന പ്രകൃതമായിരുന്നു. കല്ലറ, പെരിങ്ങമ്മല മണ്ഡലം കോണ്‍ഗ്രസ് കമ്മിറ്റികളില്‍ പ്രവര്‍ത്തിച്ച ആദ്യകാല നേതാക്കളില്‍ ഒരാള്‍ കൂടിയായ സൈനുദ്ദീന് കല്ലറ മണ്ഡലം കോണ്‍ഗ്രസ് പ്രസിഡന്റായി പ്രവര്‍ത്തിക്കുകയും പിന്നീടു പെരിങ്ങമ്മലയിലേക്കു താമസം മാറ്റി കോണ്‍ഗ്രസ് മണ്ഡലം കമ്മിറ്റിയില്‍ സജീവമാകുകയും ചെയ്തു.
കോണ്‍ഗ്രസ് പെരിങ്ങമ്മല മണ്ഡലം വൈസ് പ്രസിഡന്റ്, ജനറല്‍ സെക്രട്ടറി, സേവാദള്‍ കല്ലറ ബ്ളോക്ക് ചെയര്‍മാന്‍, ഐഎന്‍ടിയുസി തെന്നൂര്‍ മേഖലാ പ്രസിഡന്റ്, ഇക്ബാല്‍ ഹൈസ്കൂള്‍ പിടിഎ പ്രസിഡന്റ് എന്നീ നിലകളില്‍ പൊതുരംഗത്തു നിറഞ്ഞുനിന്നിരുന്നു. കഴിഞ്ഞ വര്‍ഷം ബൈക്ക് അപകടത്തില്‍ മകനും ചെറുമകളും മരിച്ചതു സൈനുദ്ദീന്റെ ജീവിതത്തില്‍ കനത്ത ആഘാതമായി. മൂന്നു മാസത്തോളമായി സ്വകാര്യ ആശുപത്രിയില്‍ ചികില്‍സയിലായിരുന്നു. കൊച്ചുകരിക്കകം ടൌണ്‍ മസ്ജിദില്‍ കബറടക്കി. വന്‍ ജനാവലി സൈനുദ്ദീന് ആദരാഞ്ജലി അര്‍പ്പിക്കാന്‍ എത്തിയിരുന്നു. തെന്നൂര്‍ ജംക്ഷനില്‍ കോണ്‍ഗ്രസ് മണ്ഡലം പ്രസിഡന്റ് ബി. പവിത്രകുമാറിന്റെ അധ്യക്ഷതയില്‍ സര്‍വകക്ഷി അനുശോചനയോഗം ചേര്‍ന്നു. മൌനജാഥയും നടന്നു.
കോണ്‍ഗ്രസ് പെരിങ്ങമ്മല മണ്ഡലം വൈസ് പ്രസിഡന്റ്, ജനറല്‍ സെക്രട്ടറി, സേവാദള്‍ കല്ലറ ബ്ളോക്ക് ചെയര്‍മാന്‍, ഐഎന്‍ടിയുസി തെന്നൂര്‍ മേഖലാ പ്രസിഡന്റ്, ഇക്ബാല്‍ ഹൈസ്കൂള്‍ പിടിഎ പ്രസിഡന്റ് എന്നീ നിലകളില്‍ പൊതുരംഗത്തു നിറഞ്ഞുനിന്നിരുന്നു. കഴിഞ്ഞ വര്‍ഷം ബൈക്ക് അപകടത്തില്‍ മകനും ചെറുമകളും മരിച്ചതു സൈനുദ്ദീന്റെ ജീവിതത്തില്‍ കനത്ത ആഘാതമായി. മൂന്നു മാസത്തോളമായി സ്വകാര്യ ആശുപത്രിയില്‍ ചികില്‍സയിലായിരുന്നു. കൊച്ചുകരിക്കകം ടൌണ്‍ മസ്ജിദില്‍ കബറടക്കി. വന്‍ ജനാവലി സൈനുദ്ദീന് ആദരാഞ്ജലി അര്‍പ്പിക്കാന്‍ എത്തിയിരുന്നു. തെന്നൂര്‍ ജംക്ഷനില്‍ കോണ്‍ഗ്രസ് മണ്ഡലം പ്രസിഡന്റ് ബി. പവിത്രകുമാറിന്റെ അധ്യക്ഷതയില്‍ സര്‍വകക്ഷി അനുശോചനയോഗം ചേര്‍ന്നു. മൌനജാഥയും നടന്നു.
പൊന്മുടിയില്‍ ബൈക്ക് അപകടം: ഭാര്യയ്ക്കും ഭര്‍ത്താവിനും പരുക്ക്
വിതുര. പൊന്മുടി പത്താംവളവിനു സമീപം ബൈക്കും കാറും കൂട്ടിയിടിച്ച് ബൈക്ക് യാത്രികരായ ഭാര്യയ്ക്കും ഭര്‍ത്താവിനും പരുക്കേറ്റു. തിരുവനന്തപുരം പാപ്പനംകോട് സ്വദേശികളായ പ്രേംശങ്കര്‍(26), രശ്മിപ്രസാദ്(22) എന്നിവര്‍ക്കാണു പരുക്ക്. ഇന്നലെ വൈകിട്ടായിരുന്നു സംഭവം. പൊന്മുടി സന്ദര്‍ശിക്കാനെത്തിയതായിരുന്നു. ഇരുവര്‍ക്കും വിതുര ഗവ. കമ്യൂണിറ്റി ഹെല്‍ത്ത് സെന്ററില്‍ പ്രാഥമിക ചികില്‍സ നല്‍കിയശേഷം 108 ആംബുലന്‍സില്‍ മെഡിക്കല്‍ കോളജ് ആശുപത്രിയിലെത്തിച്ചു
ഐഒബി നന്ദിയോട്ട് അള്‍ട്രാ സ്മാള്‍ ബ്രാഞ്ച് ആരംഭിച്ചു
പാലോട്. ഇടപാടുകാരുടെ സൌകര്യാര്‍ഥം ഇന്ത്യന്‍ ഓവര്‍സീസ് ബാങ്ക് പാലോട് ശാഖ നന്ദിയോട്ട് ആരംഭിച്ച അള്‍ട്രാ സ്മാള്‍ ബ്രാഞ്ചിന്റെ ഉദ്ഘാടനം റീജനല്‍ മാനേജര്‍ ഇന്ദിരാ പത്മിനി നിര്‍വഹിച്ചു. ബ്രാഞ്ച് മാനേജര്‍ മധുസൂദനന്‍, ജോയിതോമസ്, ബി.കെ. നാഗേഷ്കുമാര്‍ എന്നിവര്‍ പ്രസംഗിച്ചു. എല്ലാ ബുധനാഴ്ചയും 11 മുതല്‍ മൂന്നു മണി വരെ ബ്രാഞ്ച് പ്രവര്‍ത്തനം ഉണ്ടാകും. ഫോണ്‍: 2842225
Subscribe to:
Posts (Atom)