പാലോട്: ഏതു നിമിഷവും നിലംപൊത്താവുന്ന വീട് കണ്ടിട്ടും അധികൃതര്‍ ആനുകൂല്യം നിഷേധിക്കുന്നതായി പരാതി. ആനുകൂല്യത്തിനുള്ള പട്ടികയില്‍ ഒന്നാമതായിരുന്ന കുടുംബത്തെ വെട്ടി ഏഴാമതാക്കിയതായി പരാതി. നന്ദിയോട് പാലുവള്ളി ഇന്ദിരാനഗര്‍ തടത്തരികത്തു വീട്ടില്‍റോസ്മേരിയാണ് അവഗണനയുടെ കയത്തിലായത്. ഗ്രാമസഭയില്‍ വായിച്ചപ്പോള്‍ റോസ്മേരിയുടെ പേര് ഒന്നാമതായിരുന്നെന്നു സമീപവാസികള്‍ സാക്ഷ്യപ്പെടുത്തുന്നു. എന്നാല്‍ പഞ്ചായത്തില്‍ ലിസ്റ്റിട്ടപ്പോള്‍ ഏഴാമതായി.
ഇതിനു പിന്നില്‍ രാഷ്ട്രീയമാണെന്നും ലിസ്റ്റില്‍ ഉള്‍പ്പെട്ടിരിക്കുന്ന പലര്‍ക്കും ഇതിനെക്കാള്‍ നല്ല വീടുകളാണുള്ളതെന്നും ആക്ഷേപം ഉയര്‍ന്നിട്ടുണ്ട്. പഞ്ചായത്തില്‍ നാട്ടുകാര്‍ പരാതി നല്‍കിയെങ്കിലും തിരിഞ്ഞുനോക്കിയില്ലെന്നും റോസ് മേരി പറയുന്നു. കഴിഞ്ഞ ദിവസം ഇവരുടെ വീടിന്റെ പിന്‍ഭാഗം ഇടിഞ്ഞുവീണു. പ്ളാസ്റ്റിക് കൊണ്ടു മൂടിയാണു ചോര്‍ച്ചയില്‍ നിന്നു രക്ഷനേടുന്നത്. പക്ഷേ, ഏതു നിമിഷവും വീട് നിലംപൊത്തുമെന്ന ആശങ്കമൂലം ഉറക്കമില്ലാത്ത രാത്രികളാണ് ഇവര്‍ക്ക്.
അതേസമയം ലിസ്റ്റില്‍ മാറ്റം വരുത്തിയിട്ടില്ലെന്നും ഗ്രാമസഭ തിരഞ്ഞെടുത്ത ക്രമത്തില്‍ തന്നെയാണു ലിസ്റ്റ് പ്രസിദ്ധീകരിച്ചതെന്നും പഞ്ചായത്തംഗം സിന്ധു പ്രദീപ് പറഞ്ഞു. ന്യൂനപക്ഷ വിഭാഗത്തില്‍ അപേക്ഷ നല്‍കിയ ഇവര്‍ക്കു ഫണ്ട് വരുന്നമുറയ്ക്കു പണം നല്‍കുമെന്നും അവര്‍ പറഞ്ഞു.
