പാലോട്. അരിപ്പ കൊച്ചു കലുങ്കില്‍ കഴിഞ്ഞ രാത്രി ഇറങ്ങിയ ഒറ്റയാന്‍ കാട്ടാന ഭീകരാന്തരീക്ഷം സൃഷ്ടിച്ചു. കൊച്ചുകലുങ്ക് ശിവാലയത്തില്‍ ആഷിക്കിന്റെ വീട്ടിലാണു കാട്ടാന ്തിക്രമിച്ചു കയറിയത്. വീട്ടില്‍ കടന്ന് വളര്‍ത്തു നായയുടെ കൂട് തകര്‍ത്തു നായയെ കുത്തുകയായിരുന്നു.. ഡോവര്‍മാന്‍ വര്‍ഗത്തിലുള്ള നായയാണു. നായയുടെ വയറ്റില്‍ കൊമ്പ് തുളച്ചു കയറി ഗുരുതരമായി പരുക്കേറ്റു. നാട്ടുകാര്‍ തടിച്ചു കൂടി ബഹളം വച്ചപ്പോള്‍ പിന്‍വാങ്ങിയ ആന പരിസരത്തെ കൃഷിയിടത്തില്‍ ഏറെ നാശം വിതച്ചു.
വൈദ്യുതി പോസ്റ്റ് മറിക്കാനുള്ള ശ്രമവും നടത്തി. രാത്രി 12 മണിയോടെയാണ് ആന ഇറങ്ങിയത്. മുന്‍പും പ്രദേശത്ത് ആന ഇറങ്ങി വാഴയും തെങ്ങുമൊക്കെ നശിപ്പിച്ചിട്ടുണ്ട്. വനമേഖലയില്‍ നിന്ന് ഒന്നര കിലോമീറ്റര്‍ ദൂരെയാണു പ്രദേശം. കാട്ടാന നാശം വിതച്ച പ്രദേശത്തു ജന പ്രതിനിധികളായ സോഫി തോമസ്, ബി, പവിത്രകുമാര്‍, വി. പ്രസാദ് തുടങ്ങിയവര്‍ സന്ദര്‍ശിച്ചു. കാട്ടാനയുടെ ആക്രമണം തടയാന്‍ വൈദ്യുതി വേലി വേണമെന്നു നാട്ടുകാര്‍ ആവശ്യപ്പെട്ടു.
