ആറ്റിങ്ങല്‍: എല്‍.ഡി.എഫ്. സ്ഥാനാര്‍ഥിക്കുവേണ്ടി വോട്ട് അഭ്യര്‍ഥിച്ച് സ്ഥാപിച്ച ഫ്‌ളക്‌സ് ബോര്‍ഡില്‍ യു.ഡി.എഫ്. സ്ഥാനാര്‍ഥിയുടെ ചിത്രം കണ്ട് നാട്ടുകാര്‍ ഞെട്ടി. സമ്പത്തിന്റെ ശരീരം ബിന്ദുകൃഷ്ണയുടെ തല, ആരോ ഒപ്പിച്ച കുസൃതി കണ്ട് എല്‍.ഡി.എഫും യു.ഡി.എഫും ഒന്നാേയാ എന്നറിയാന്‍ നാട്ടുകാര്‍ നേതാക്കന്മാരുടെ ഫോണിലേക്ക് തുരുതുരാ വിളിക്കാന്‍ തുടങ്ങി. വിഷയം സങ്കീര്‍ണമാകുമെന്ന് വന്നതോടെ ഏതാനും നാട്ടുകാര്‍ ചേര്‍ന്ന് യു.ഡി.എഫ്. സ്ഥാനാര്‍ഥിയുടെ ചിത്രം നീക്കി. ആറ്റിങ്ങല്‍ ടി.ബി.ജങ്ഷനിലാണ് സംഭവം.എല്‍.ഡി.എഫ് സ്ഥാനാര്‍ഥി ഡോ.എ.സമ്പത്തിന്റെ പ്രചാരണത്തിനായി ചിത്രമടക്കമുള്ള ഫ്‌ളക്‌സ് ബോര്‍ഡ് എല്‍.ഡി.എഫ്. തിരഞ്ഞെടുപ്പ് കമ്മിറ്റി ടി.ബി. ജങ്ഷനില്‍ സ്ഥാപിച്ചിരുന്നു. കഴിഞ്ഞദിവസം രാത്രിയില്‍ ആരോ യു.ഡി.എഫ്. സ്ഥാനാര്‍ഥി അഡ്വ. ബിന്ദുകൃഷ്ണയുടെ ചിത്രം സമ്പത്തിന്റെ ചിത്രത്തിനുമേല്‍ പതിച്ചു. രാവിലെ ബോര്‍ഡ് കാണാനിടയായ നാട്ടുകാര്‍ നേതാക്കളെ വിളിച്ചു പറഞ്ഞു. തുടര്‍ന്ന് എല്‍.ഡി.എഫ്. പ്രവര്‍ത്തകര്‍ സ്ഥലത്തെത്തി ബോര്‍ഡിനു ചുവട്ടില്‍ 'ഇതാണോ സംസ്‌കാരം' എന്നെഴുതിെവച്ചു. വിഷയം വഷളാകുമെന്ന് കണ്ട നാട്ടുകാരില്‍ ചിലരെത്തി ബോര്‍ഡില്‍ നിന്നും ബിന്ദുകൃഷ്ണയുടെ ചിത്രം നീക്കം ചെയ്തു. ഇത് സംബന്ധിച്ച് പരാതികളൊന്നും കൊടുത്തിട്ടില്ലെന്ന് എല്‍.ഡി.എഫ്. നേതാക്കളറിയിച്ചു.