പാചകവാതകം വിതരണം നിര്‍ത്തി
വിതുര.പാചകവാതകം കയറ്റിവന്ന വാഹനത്തിലെ ജീവനക്കാരെ മര്‍ദിച്ച കേസിലെ പ്രതികളെ അറസ്റ്റ്ചെയ്യാത്തതില്‍ പ്രതിഷേധിച്ച് തോട്ടുമുക്ക് മേഖലയിലെ ഗ്യാസ് വിതരണം നിര്‍ത്തിവയ്ക്കാന്‍ തീരുമാനിച്ചതായി നെടുമങ്ങാട് നേതാജി ഗ്യാസ് ഏജന്‍സിയിലെ തൊഴിലാളിയൂണിയന്‍ നേതാക്കള്‍ അറിയിച്ചു. പാചകവാതകവിതരണം മുടങ്ങിയതില്‍ പ്രതിഷേധിച്ച് ശനിയാഴ്ച പാചകവാതകവുമായി വന്ന വണ്ടിയിലെ ജീവനക്കാര്‍ക്ക് തൊളിക്കോട് പഞ്ചായത്തിലെ തോട്ടുമുക്കില്‍വച്ച് മര്‍ദനമേറ്റിരുന്നു.
നേതാജി ഗ്യാസ് ഏജന്‍സിയിലെ ജീവനക്കാരായ വെഞ്ഞാറമൂട് ജി. അനില്‍കുമാര്‍, സിറാജുദീന്‍, അബ്ദുല്‍ റഹൂബ് എന്നിവരാണു മര്‍ദനമേറ്റതിനെ തുടര്‍ന്ന് താലൂക്ക് ആശുപത്രിയില്‍ കഴിയുന്നത്. തോട്ടുമുക്ക് സ്വദേശി നാസറിനെയും മറ്റു മൂന്നുപേരെയും പ്രതിയാക്കി മര്‍ദനമേറ്റവര്‍ വിതുര പൊലീസില്‍ പരാതി നല്‍കി. പ്രശ്നത്തിനിടയില്‍ ഗ്യാസ്സിലിണ്ടറും മോഷ്ടിച്ചതായി പരാതിയില്‍ പറയുന്നു. കാണാതായ സിലിണ്ടര്‍ പിന്നീട് നാട്ടുകാര്‍ സ്റ്റേഷനിലെത്തിച്ചു.
തോട്ടുമുക്ക് മേഖലയില്‍ മാസങ്ങളായി പാചകവാതകവിതരണം തടസ്സപ്പെട്ടിരിക്കുകയായിരുന്നു. ഗ്യാസ് വിതരണംആഴ്ചകളോളം തടസ്സപ്പെട്ടതിനെ തുടര്‍ന്ന് മുന്‍പും ഇവിടെ പ്രശ്നമുണ്ടായിട്ടുണ്ട്. ശനിയാഴ്ച ഗ്യാസ് വണ്ടി വന്നെങ്കിലും എല്ലാ ഉപഭോക്താക്കള്‍ക്കും പാചകവാതകം ലഭിച്ചില്ല. ഇതില്‍ ക്ഷുഭിതരായ നാട്ടുകാരാണു ജീവനക്കാരുമായി പ്രശ്നമുണ്ടാക്കിയത്. പ്രതികളുടെ പേരില്‍ ഉടന്‍ നടപടിയെടുക്കുമെന്ന് എസ്ഐ അറിയിച്ചു.