സ്ഥിരം വെള്ളക്കെട്ടുള്ള കരടിമുക്ക് ഗാര്‍ഡ് സ്റ്റേഷന്‍ ഭാഗത്ത് ആവശ്യത്തിന് ടാര്‍ ഉപയോഗിക്കാതെ പണി നടത്തിയതാണ് നാട്ടുകാരെ പ്രകോപിപ്പിച്ചത്. സംഭവം ശ്രദ്ധയില്‍പ്പെട്ടതിനെത്തുടര്‍ന്ന് രാവിലെ 11.30-ഓടെ നാട്ടുകാര്‍ സംഘടിക്കുകയായിരുന്നു. രണ്ടുവര്‍ഷം മുമ്പ് ആരംഭിച്ച പണി പൂര്‍ത്തിയാക്കുന്നതിന് പൊതുമരാമത്ത് വകുപ്പ് അധികൃതര്‍ രണ്ടുതവണ സമയം നീട്ടിനല്‍കി. ഇതിലൂടെ അടങ്കല്‍ തുക പുനഃക്രമീകരിച്ച് നല്‍കിയതുവഴി കരാറുകാരന് മൂന്ന് ലക്ഷത്തില്‍പ്പരം രൂപ അധികമായി ലഭിച്ചതായും റസിഡന്റ്‌സ് അസോസിയേഷന്‍ ഭാരവാഹികള്‍ പറയുന്നു.
പണി രണ്ടുവര്‍ഷം ദീര്‍ഘിപ്പിച്ചതിലൂടെ റോഡ് തീര്‍ത്തും ദുര്‍ഘടമായി മാറിയിട്ടുണ്ട്. നടുവൊടിക്കുന്ന ഇ റോഡിലെ യാത്രയില്‍ ഒരുവര്‍ഷത്തിനിടെ രണ്ട് ഡസനിലധികം അപകടങ്ങളുണ്ടായി. ഏറ്റവുമൊടുവില്‍ ഭരതന്നൂര്‍ വണ്ടികിടക്കും പൊയ്ക സ്വദേശി എസ്. അജിത്ത് മരിച്ചത് കരടിമുക്കിലെ ഗട്ടറില്‍ ആട്ടോറിക്ഷ വീണ് മറിഞ്ഞാണ്.
നാട്ടുകാര്‍ റോഡ് പണി തടസ്സപ്പെടുത്തിയതറിഞ്ഞ കോലിയക്കോട് കൃഷ്ണന്‍നായര്‍ എം.എല്‍.എ., അസിസ്റ്റന്റ് എക്‌സിക്യൂട്ടീവ് എന്‍ജിനീയറെ ബന്ധപ്പെട്ട് ചര്‍ച്ച നടത്തി.