വര്‍ഷങ്ങള്‍ക്കു മുമ്പ് നാടുവിട്ട മകന്‍ അന്ത്യകര്‍മങ്ങള്‍ക്ക് വരുമെന്ന പ്രതീക്ഷയില്‍ അച്ഛന്റെ മൃതദേഹം മോര്‍ച്ചറിയില്‍

പാലോട്: വര്‍ഷങ്ങള്‍ക്കു മുമ്പ് നാട്ടുവിട്ട മകന്‍ വരുമെന്ന പ്രതീക്ഷയില്‍ പിതാവിന്റെ മൃതദേഹം മോര്‍ച്ചറിയില്‍. പേരയം കുടവനാട് സനീഷ്ഭവനില്‍ ടി. ശശിധരന്റെ (63) മൃതദേഹമാണ് മകന്‍ ശ്യാംകുമാറിനെ പ്രതീക്ഷിച്ച് ബന്ധുക്കള്‍ മെഡിക്കല്‍ കോളേജ് ആസ്പത്രി മോര്‍ച്ചറിയില്‍ സൂക്ഷിച്ചിരിക്കുന്നത്. ഒരാഴ്ച മുമ്പ് ഹൃദയസംബന്ധമായ അസുഖത്തെത്തുടര്‍ന്നാണ് ശശിധരനെ ആസ്പത്രിയില്‍ പ്രവേശിപ്പിച്ചത്. ശനിയാഴ്ച രാത്രി മരിച്ചു.

ഇരുപതു വര്‍ഷം മുമ്പ് പതിനേഴാമത്തെ വയസ്സിലാണ് ശ്യാംകുമാര്‍ ബന്ധുവിനൊപ്പം മുംബൈയിലേക്ക് പോയത്. അവിടെനിന്നും പിന്നീട് ഈയാളെ കാണാതാവുകയായിരുന്നു. ഏഴുവര്‍ഷം മുമ്പ് ഒരിക്കല്‍ ശ്യാംകുമാര്‍ വീട്ടിലെത്തിയിരുന്നുവെന്ന് മാതാവ് രാധ പറഞ്ഞു.

ആസ്പത്രിയിലേക്കുള്ള വഴിമധ്യേ മകനെ കാണണമെന്ന് ശശിധരന്‍ ആഗ്രഹം പ്രകടിപ്പിച്ചിരുന്നു. മരിക്കുന്നതിനുമുമ്പെത്തിയില്ലെങ്കില്‍ മൃതദേഹമെങ്കിലും മകനെ കാണിക്കണമെന്നും പിതാവ് മറ്റു മക്കളോടും ഭാര്യയോടും പറഞ്ഞിരുന്നു.

ചൊവ്വാഴ്ചവരെ മൃതദേഹം മോര്‍ച്ചറിയില്‍ സൂക്ഷിക്കാനാണ് ബന്ധുക്കളുടെ തീരുമാനം. അതിനുമുമ്പ് മുംബൈയില്‍ എവിടെയോ ഉള്ള ശ്യാംകുമാര്‍ പിതാവിന്റെ അന്ത്യാഭിലാഷം പോലെ വന്നുചേരുമെന്നാണ് അവരുടെ പ്രതീക്ഷ. ശാലിനി, സന്തോഷ്‌കുമാര്‍, സതീശന്‍ എന്നിവരാണ് ശശിധരന്റെ മറ്റുമക്കള്‍. ലതനകുമാര്‍ മരുമകന്‍.