പാലോട്: ആദിവാസി മേഖലയിലേക്കുള്ള റോഡ് വനപാലകര് കുഴികളെടുത്ത് വെട്ടിമുറിച്ചു. ഒരു കിലോമീറ്ററിനിടയില് അഞ്ച് കിടങ്ങുകളാണ് എടുത്തത്. സ്വന്തമായി വാഹനമുള്ളവരും ഇല്ലാത്തവരുമായ ആദിവാസികള്പുറത്തിറങ്ങാനാവാതെ നട്ടംതിരിയുകയാണ്. പാങ്ങോട് പഞ്ചായത്തിലെ മീഞ്ചാടി ഗ്രാമം തികച്ചും ഒറ്റപ്പെട്ടനിലയില്.
കാഞ്ചിനട-മീഞ്ചാടി ആദിവാസി റോഡിലാണ് വനപാലകര് കിടങ്ങുകള് തീര്ത്തത്. മീഞ്ചാടി ഗ്രാമത്തില് ഇരുപത്തിയഞ്ചിലധികം കുടുംബങ്ങളാണ് താമസം. ഇതില് ചിലര്ക്ക് സ്വന്തമായി വാഹനങ്ങളുമുണ്ട്. എന്നാല്, വനപാലകര് റോഡില് കിടങ്ങുകള് തീര്ത്തതോടെ മുഴുവന്പേര്ക്കും കാല്നടയാത്ര മാത്രമായി. പനി ബാധിതരെ ആസ്പത്രിയിലെത്തിക്കുന്നതിനും കുട്ടികള്ക്ക് വിദ്യാലയങ്ങളിലെത്തുന്നതിനും ഏറെ പ്രയാസമാണ്. പാലോട് റേഞ്ച് ഓഫീസിന്റെ പരിധിയിലാണ് ഈ പ്രദേശം. കാഞ്ചിനടയിലും പരിസരങ്ങളിലും വര്ധിച്ചുവരുന്ന മണലൂറ്റ് തടയുന്നതിന്റെ ഭാഗമായിട്ടാണ് റോഡില് കിടങ്ങ് തീര്ത്തതെന്ന് വനംവകുപ്പധികൃതര് പറയുന്നു.
മണലറ്റ് തടയുന്നതിന് റവന്യ, വനം, പോലീസ് അധികൃതര് ചേര്ന്ന് സംയുക്തനടപടികള് കൈക്കൊള്ളണമെന്നും അല്ലാതെ തങ്ങളുടെ യാത്രാസ്വാതന്ത്ര്യത്തെ തടസ്സപ്പെടുത്തരുതെന്നുംഗ്രാമീണരും പറയുന്നു.