പാലോട്: മാലിന്യ ടാങ്ക് തകര്‍ന്നുണ്ടായ ദുരിതത്തില്‍ നടന്ന അതിവേഗ രക്ഷാപ്രവര്‍ത്തനം മാതൃകയായി. കരിമണ്‍കോടുനിന്നു മൂന്നു കിലോമീറ്ററിലേറെ ഉള്‍വനത്തിലാണു സംഭവം നടന്നതെങ്കിലും അറിഞ്ഞയുടന്‍ തന്നെ പൊലീസ് പാഞ്ഞെത്തി. പിന്നാലെ ഫയര്‍ഫോഴ്സും നാട്ടുകാരും. മരണം ഉറപ്പിച്ചെങ്കിലും അടുക്കാനാവാത്ത വിഷവാതകത്തിന്റെ അസഹനീയ ദുര്‍ഗന്ധത്തിലും ഒരു നിമിഷം പോലും ചിന്തിച്ചു നില്‍ക്കാതെ പൊലീസും ഫയര്‍ഫോഴ്സും കര്‍മനിരതരായി. നാട്ടുകാരും കഴിയുന്ന സഹായങ്ങളെല്ലാം നല്‍കി.
ഞൊടിയിടയില്‍ ഫയര്‍ഫോഴ്സുകാര്‍ പഴയ ടാങ്കില്‍നിന്നുള്ള മാലിന്യത്തിന്റെ ഒഴുക്ക് തടഞ്ഞുനിര്‍ത്തി. പാലോട് എസ്ഐ: ബൈജുവിന്റെ നിര്‍ദേശാനുസരണം അടിയന്തരമായി ജെസിബി വരുത്തി. സ്ഥലത്തേക്കു റോഡുവെട്ടിയാണ് ജെസിബി കടന്നെത്തിയത്.
സംഭവമറിഞ്ഞു ഡിവൈഎസ്പി: മുഹമ്മദ് ഷാഫി, സിഐ: പ്രദീപ് കുമാര്‍ എന്നിവര്‍ എത്തി നേതൃത്വം നല്‍കി. ഉടന്‍തന്നെ തഹസില്‍ദാറും പാലോട് സിഎച്ച്സി മെഡിക്കല്‍ ഓഫിസര്‍ ഡോ. ഫ്രാന്‍സിസിന്റെ നേതൃത്വത്തിലുള്ള ആരോഗ്യ വകുപ്പും ജനപ്രതിനിധികളും എത്തി. ജീവന്റെ തുടിപ്പെങ്കിലും ഉണ്ടെങ്കിലോ എന്ന നിഗമനത്തില്‍ 108 ആബുലന്‍സ് അടക്കം സ്ഥലത്തെത്തി.
മാലിന്യത്തില്‍ കുളിച്ച മൃതദേഹങ്ങള്‍ പുറത്തെടുത്ത് ആശുപത്രിയില്‍ എത്തിക്കുന്നതിലും നാട്ടുകാര്‍ കൂടെയുണ്ടായിരുന്നു. എല്ലാവരും മാലിന്യത്തില്‍ ചവിട്ടി നിന്നുകൊണ്ടുള്ള രക്ഷാപ്രവര്‍ത്തനത്തില്‍ ഏര്‍പ്പെട്ടപ്പോള്‍ അത് പ്രദേശം ഇന്നുവരെ കാണാത്ത ഒത്തൊരുമയായി.