പാലോട്: പോട്ടോമാവ് ആദിവാസി ഊരില്‍ വികസനത്തിന്റെ പുതുവെളിച്ചവുമായി സാമൂഹികപ്രവര്‍ത്തകരുടെ നേതൃത്വത്തില്‍ ആദിവാസി കൂട്ടായ്മ സംഘടിപ്പിച്ചു. ആദിവാസികളുടെ സമസ്ത മേഖലകളിലെയും ഉന്നമനം ലക്ഷ്യമിട്ട് ഇവിടത്തെ ജനങ്ങളുടെ കൂട്ടായ്മ രൂപപ്പെടുത്തി വികസനകാര്യങ്ങള്‍ സര്‍ക്കാരിന്റെയും മറ്റ് ഏജന്‍സികളുടെയും ശ്രദ്ധയില്‍പ്പെടുത്തി നടപ്പിലാക്കുകയെന്നതാണു കൂട്ടായ്മയുടെ ലക്ഷ്യം. ഇതിന്റെ തുടക്കമെന്ന നിലയില്‍ കോളനിയിലെ പഠിക്കാനാഗ്രഹിക്കുന്ന എല്ലാവര്‍ക്കും വേണ്ടിയുള്ള വിദ്യാഭ്യാസ ക്ളാസിനു തുടക്കംകുറിച്ചു.പോട്ടോമാവില്‍ ഉപയോഗശൂന്യമായിക്കിടക്കുന്ന സാംസ്കാരിക നിലയം നവീകരിച്ചു തയ്യല്‍ പരിശീന ക്ളാസ് ആരംഭിക്കാനും തീരുമാനമായി. ആദിവാസികളുടെ ഐക്യം, ലഹരി നിര്‍മാര്‍ജനം, കൃഷി പുരോഗതി, പോട്ടോമാവിനെ അരിപ്പയുമായി ബന്ധിപ്പിക്കുന്ന ചെമ്മണ്‍പാതയുടെ നവീകരണം അടക്കം കോളനിയുടെ സമഗ്ര വികസനമാണു കൂട്ടായ്മയിലൂടെ ലക്ഷ്യമിടുന്നത്. വിദ്യാഭ്യാസ ക്ളാസിന്റെയും തൊഴില്‍ പരിശീലന യൂണിറ്റിന്റെയും ഉദ്ഘാടനം ഡിഐജി ജയരാജ് നിര്‍വഹിച്ചു.
ഊരുമൂപ്പന്‍ കുഞ്ഞുകൃഷ്ണന്‍ കാണിയുടെ അധ്യക്ഷതയില്‍ സാമൂഹികപ്രവര്‍ത്തക ധന്യരാമന്‍, പഞ്ചായത്ത് സ്ഥിരം സമിതി ചെയര്‍മാന്‍ വി.പ്രസാദ് കുടുംബശ്രീയിലെ ജയന്‍ലൈസീയം, വി.അജിത്, വി. സന്തോഷ്കുമാര്‍, കുളത്തൂപ്പുഴ റേഞ്ച് ഓഫിസര്‍, ആര്‍. അശോക്, പോട്ടോമാവ് തുളസീധരന്‍ കാണി എന്നിവര്‍ പ്രസംഗിച്ചു.