എസ്റ്റേറ്റുകളിലും വിളകളിലുമായി നൂറുകണക്കിനു റബര്‍മരങ്ങള്‍ ഒടിഞ്ഞും കടപുഴകിയും വീണു. ചെറുകിട റബര്‍ കര്‍ഷകര്‍ക്കാണു കാറ്റ് ഏറെ ദുരിതം വിതച്ചത്. വനമേഖലയില്‍ അനവധി മരങ്ങള്‍ നിലം പൊത്തി. മരങ്ങള്‍ വീണു വൈദ്യുതിലൈനുകളും തകര്‍ന്നു. വൈദ്യുതി ബോര്‍ഡിനും കനത്ത നഷ്ടമുണ്ട്. പൊന്‍മുടി റോഡില്‍ നാലിടങ്ങളില്‍ കഴിഞ്ഞ ദിവസങ്ങളില്‍ മരം കടപുഴകിയും ഒടിഞ്ഞും വീണു ഗതാഗത സ്തംഭനമുണ്ടായി. നാട്ടുകാരും പൊലീസും യാത്രക്കാരും ചേര്‍ന്നു മരം മുറിച്ചുമാറ്റിയാണു ഗതാഗതം പുനസ്ഥാപിച്ചത്.
കൃഷികള്‍ നശിച്ചതായി റിപ്പോര്‍ട്ടുണ്ട്. എല്ലാ വര്‍ഷവും ഫെബ്രുവരി മാസത്തില്‍ ഇവിടെ തമിഴ്നാടിന്റെ അതിര്‍ത്തി പ്രദേശമായ ബോണക്കാട് പാണ്ടിപ്പത്തു കടന്നെത്തുന്ന പാണ്ടിക്കാറ്റ് വീശിയടിക്കാറുണ്ട്.
തമിഴ്നാട്ടില്‍ കനത്തകാറ്റു വീശുമ്പോഴാണ് ഇവിടെയും കാറ്റ് താണ്ഡവമാടുന്നത്. ആദിവാസികള്‍ പാണ്ടിക്കാറ്റെന്നാണു പറയുന്നത്. ഇക്കുറി കാറ്റിന്‍െറ ശക്തി വര്‍ധിച്ചതായി റിപ്പോര്‍ട്ടുണ്ട്. പേപ്പാറ ഫോറസ്റ്റ് റേഞ്ചിന്‍െറ പരിധിയിലുള്ള പൊടിയം മേഖലയിലും കാറ്റ് കനത്തനാശം വിതച്ചതായി റിപ്പോര്‍ട്ടുണ്ട്. വീട് തകര്‍ന്നവരും കൃഷിനാശം സംഭവിച്ചവരും കൃഷി ഒാഫിസിലും വില്ലേജ് ഒാഫിസിലും പഞ്ചായത്തിലും പരാതി നല്‍കി.