മണലൂറ്റാണ് ഇൌ മേഖലയിലെ പ്രധാന വരുമാനസ്സ്രോതസ്. ജീപ്പില്‍ 30 ചാക്ക് മണല്‍വീതമാണ് അടിക്കുന്നത്. രണ്ടായിരം രൂപമുതല്‍ 3000 രൂപ വരെ ഇൌടാക്കും. മണല്‍കടത്തിന് എന്തെങ്കിലും തടസ്സം വരുമ്പോള്‍ വിലവര്‍ധിക്കും. കല്ലാറിലെ മണല്‍ ലേലംചെയ്തു നല്‍കാന്‍ പഞ്ചായത്ത് നടപടികള്‍ സ്വീകരിച്ചാല്‍ പ്രശ്നത്തിനു പരിഹാരം ഉണ്ടാകുകയും സാധാരണക്കാര്‍ക്കു കുറഞ്ഞ വിലയ്ക്കു മണല്‍ ലഭ്യമാകുകയും ചെയ്യുമായിരുന്നു. കീറിമുറിച്ചു രാപകല്‍ഭേദമന്യേ വന്‍തോതില്‍ മണലൂറ്റി കടത്തിയിട്ടും നടപടികളെടുക്കാത്തതു മണല്‍ ലോബികള്‍ തഴച്ചുവളരാന്‍ ഇടയായി.
തീരം ഇടിച്ചുവരെ മണലൂറ്റുന്നതുമൂലം മിക്കഭാഗത്തും നദി ഗതിമാറിയാണ് ഒഴുകുന്നത്. മാത്രമല്ല, പൊലീസിലെ ഒരു വിഭാഗം മണലൂറ്റ് ലോബിയുമായി കൈകോര്‍ത്തിരിക്കുന്നതിനാല്‍ മിക്കപ്പോഴും നടക്കുന്ന മണല്‍വേട്ട
വിജയിക്കാറില്ല. എസ്ഐ കല്ലാറില്‍ എത്തുംമുന്‍പു മണല്‍കടത്തുകാരും ഉൌറ്റുകാരും സ്ഥലംവിട്ടിരിക്കും. അനയന്ത്രിതമായ മണലൂറ്റുമൂലം നദിയുടെ മിക്ക ഭാഗത്തും മണല്‍ക്കയങ്ങള്‍ നിറഞ്ഞിട്ടുണ്ട്. അനവധി വിനോദസഞ്ചാരികള്‍ കുളിക്കുന്നതിനിടയില്‍ മണല്‍ക്കയങ്ങളില്‍ മുങ്ങിമരിച്ചിട്ടുണ്ട്.
അധികവും യുവാക്കളാണു മരണപ്പെട്ടിട്ടുള്ളത്. ചിലരെ മണല്‍ക്കയങ്ങളില്‍ നിന്നു നാട്ടുകാര്‍ രക്ഷപ്പെടുത്തിയിട്ടുണ്ട്. സ്പെഷല്‍ ബ്രാഞ്ചിന്റെ കണക്ക് പ്രകാരം ഇവിടെ അന്‍പതോളം ജീപ്പുകളിലാണു മണലടിക്കുന്നത്. ഇതില്‍ ഭൂരിഭാഗം പേരും മണലൂറ്റി കടത്തിയാണു ജീപ്പ് സ്വന്തമാക്കിയത്. രാത്രിയില്‍ വരെ വന്‍തോതില്‍ മണലൂറ്റുന്നുണ്ട്. പുലര്‍ച്ചെ മണല്‍വണ്ടികളുടെ ഘോഷയാത്രയാണ്. സൂക്ഷിച്ചു നടന്നില്ലെങ്കില്‍ മരണം ഉറപ്പാണ്. അനവധി പേരെ മണല്‍വണ്ടികള്‍ ഇടിച്ചിട്ടിട്ടുണ്ട്.
വിതുര സ്റ്റേഷനിലെ പൊലീസുകാരനെവരെ മണല്‍വണ്ടി ഇടിച്ചിടാന്‍ ശ്രമിച്ചിട്ടു വണ്ടിയുമായി കടന്നുകളഞ്ഞ സംഭവവം വരെയുണ്ടായി. മണല്‍ കയറ്റിവരുന്ന ജീപ്പുകളെ പിന്തുടര്‍ന്നു പിടികൂടാന്‍ സ്റ്റേഷനിലെ പഴഞ്ചന്‍ ജീപ്പുകള്‍ക്കു കഴിയാറില്ല. മണലൂറ്റിന്‍െറ കാഠിന്യംമൂലം വേനല്‍ മൂര്‍ഛിക്കും മുന്‍പു നദി വറ്റിവരണ്ടുതുടങ്ങും. നദിയില്‍ നീരൊഴുക്ക് കുറയുന്നതോടെ തീരത്തുള്ള കിണറുകളിലെ ജലനിരപ്പും താഴും. വേനല്‍ക്കാലത്തു നദി മലിനപ്പെടുന്നതുമൂലം ജലം ഉപയോഗിക്കാന്‍ കഴിയാത്ത അവസ്ഥയിലാകും.
നൂറുകണക്കിനു നാട്ടുകാര്‍ നദിയിലെ ജലമാണ് ഉപയോഗിക്കുന്നത്. നീരൊഴുക്ക് കുറയുന്നതു പമ്പ്ഹൌസുകളുടെ പ്രവര്‍ത്തനത്തെ ബാധിക്കുകയും പൈപ്പ്ജല വിതരണം തടസ്സപ്പെടുകയും ചെയ്യുന്നുണ്ട്. മണലൂറ്റും കല്ലാറിലെ അതിക്രമങ്ങളും അപകടമരണങ്ങളും തടയുന്നതിനായി തിരുവനന്തപുരം റൂറല്‍ എസ്പി പത്തു വര്‍ഷം മുന്‍പു കല്ലാറില്‍ പൊതുജനസമ്പര്‍ക്ക പരിപാടി സംഘടിപ്പിച്ചിരുന്നു. നാട്ടുകാരുടെ ആവശ്യത്തെ തുടര്‍ന്നു കല്ലാറില്‍ ഉടന്‍ പൊലീസ് ഒൌട്ട്പോസ്റ്റ് ആരംഭിക്കുമെന്നു റൂറല്‍ എസ്പി വാഗ്ദാനം നടത്തി. പക്ഷേ ഒൌട്ട്പോസ്റ്റ് കല്ലാറിലെ വെള്ളം പോലെ ഒലിച്ചുപോയി.
താലൂക്കില്‍ മണല്‍ സ്ക്വാഡ് രൂപീകരിച്ചിട്ടുണ്ടെങ്കിലും പ്രവര്‍ത്തനം സജീവമല്ല. മിക്കപ്പോഴും റവന്യു ഡിപ്പാര്‍ട്ട്മെന്റ് മണല്‍കടത്തലിനെതിരെ നടപടിയെടുക്കാറില്ല. മണലൂറ്റിനു പുറമെ ചന്ദനക്കടത്തുസംഘവും ഇവിടെ സജീവമാണ്. തമിഴ്നാട് കീരിപ്പാറ വനത്തില്‍ എത്തി ചന്ദനം മുറിച്ചുകൊണ്ടുവന്നു വില്‍ക്കുന്ന അനവധി പേര്‍ ഇവിടെ സജീവമാണ്.