പാലോട്: ഞാറനീലി അംബേദ്കര്‍ വിദ്യാനികേതന്‍ സി.ബി.എസ്.ഇ സ്‌കൂളിന്റെ ഗേറ്റ്
ഉള്‍പ്പെടുന്ന മതില്‍ അടര്‍ന്നുവീണ് നാല് കുട്ടികള്‍ക്ക് പരിക്കേറ്റു. നാലാംക്ലാസ്
വിദ്യാര്‍ഥികളായ പാലക്കാട് സ്വദേശി വിഷ്ണു (9), വയനാട് സ്വദേശി വൈഷ്ണവ്, കാസര്‍കോട്
സ്വദേശി മോനിഷ്, വയനാട് സ്വദേശി അക്ഷയ് എന്നിവര്‍ക്കാണ് പരിക്കേറ്റത്. ഇതില്‍
വിഷ്ണു മെഡിക്കല്‍ കോളേജ് ആസ്പത്രിയില്‍ ചികിത്സയിലാണ്. വിഷ്ണുവിന്റെ പരിക്ക്
ഗുരുതരമാണ്. ഗേറ്റും ഗേറ്റ് ഘടിപ്പിച്ചിരുന്ന സിമന്റ് തൂണും തലയില്‍ വീണ
വിഷ്ണുവിന്റെ പല ഭാഗങ്ങളിലെല്ലാം ആഴത്തില്‍ മുറിവേറ്റു. മെഡിക്കല്‍ കോളേജിലെത്തിച്ച
വിഷ്ണുവിനെ അടിയന്തരശസ്ത്രക്രിയയ്ക്ക് വിധേയമാക്കി. മറ്റുള്ളവരുടെ പരിക്കുകള്‍
ഗുരുതരമല്ല. ഇവരെ നെടുമങ്ങാട് താലൂക്ക് ആസ്പത്രിയിലാക്കി.മതില്‍ നിര്‍മാണത്തിലെ അപാകം ആരോപിച്ച് സ്ഥലത്തെത്തിയ പി.ഡബ്ല്യു.ഡി അധികൃതരെ നാട്ടുകാര്‍ മണിക്കൂറുകളോളം തടഞ്ഞുവച്ചു. മതിലും ഗേറ്റ് പിടിപ്പിച്ചിരുന്ന സിമന്റ് ബീമും തമ്മില്‍ ബന്ധമുണ്ടായിരുന്നില്ല. ഇതാണ് അപകടത്തിനു കാരണമായത്. രാവിലെ ആണ്‍കുട്ടികളുടെ ഹോസ്റ്റലില്‍നിന്നും മെസ്സിലെത്തി ആഹാരം കഴിച്ചുമടങ്ങിയ കുട്ടികള്‍ക്കാണ് അപകടം സംഭവിച്ചത്.
ആണ്‍കുട്ടികളും പെണ്‍കുട്ടികളുമടക്കം 400 വിദ്യാര്‍ഥികളാണ് ഇവിടെ പഠിക്കുന്നത്.
അപകടം നടന്ന് മണിക്കൂറുകള്‍ കഴിഞ്ഞിട്ടും പട്ടികവര്‍ഗവകുപ്പ് ഉദ്യോഗസ്ഥര്‍ സ്ഥലത്തെത്താത്തതില്‍ രക്ഷിതാക്കള്‍ പ്രതിഷേധിച്ചു. ഇതിനിടയിലാണ് പി.ഡബ്ല്യു.ഡി ബില്‍ഡിങ് സെക്ഷന്‍ എ.ഇ. ശശിധരന്‍ ആശാരിയും ചുറ്റുമതില്‍ പണിത കോണ്‍ട്രാക്ടര്‍ സ്റ്റീഫനും സ്ഥലത്തെത്തിയത്. ഇവരെ കണ്ടതും നാട്ടുകാരും രക്ഷിതാക്കളും ക്ഷുഭിതരായി. തുടര്‍ന്ന് രണ്ടാളെയും തടഞ്ഞുവച്ചു. വൈകുന്നേരത്തോടെ പാലോട് സി.ഐ. പ്രദീപ്കുമാര്‍, എസ്.ഐ ബൈജു എന്നിവരുടെ നേതൃത്വത്തില്‍ പോലീസ് സംഘവും ഐ.ടി.ഡി.പി പ്രോജക്ട് ഓഫീസര്‍ രമാദേവിയും സ്ഥലത്തെത്തി നടത്തിയ ചര്‍ച്ചകളെ തുടര്‍ന്ന് പൊതുമരാമത്ത് വകുപ്പ് ഉദ്യോഗസ്ഥരെ മോചിപ്പിച്ചു. രക്ഷിതാക്കളുടെ പരാതിയിന്മേല്‍ കരാറുകാരനെതിരെ കേസ് എടുക്കുമെന്ന് പാലോട് പോലീസ് അറിയിച്ചു.
Tags: Thiruvananthapuram District News. Palodu Local News. Nedumangad. Vamanapuram. തിരുവനന്തപുരം. നെടുമങ്ങാട്. വാമനപുരം. പാലോട്. Kerala. കേരളം